「Baby Shark, doo doo doo doo doo doo ......」
每次響起呢個奏樂，相信媽媽們都絕不陌生，聽得多，有時都幾轟炸，但就唯獨你嘅寶貝百聽不厭；兒歌表面可能只係陪伴孩子放電恩物，但其實喺不知不覺間，佢已經教識咗小朋友好多基本知識，好似Hit爆宇宙嘅《Baby Shark》，有傳連傳統名牌幼稚園入學試都考佢，至於原因係咩？鯊魚太既唔係老師，更加唔係內部人員，真正理由我就梗係唔知啦，但以表面分析，《Baby Shark》除咗易記洗腦，其實仲包含咗好多動作配合，例如：Daddy Shark同Mommy Shark手部演釋方法，歌詞與內容嘅劇情表達，考你記性之外，仲可以睇到孩子小手肌同大肌肉配合，分分鐘仲可以從演釋過程中，反映到孩子活躍與自制程度，所以兒歌又點止兒歌咁簡單！
其實無論係語文系列嘅《ABC》或者伸延到生活應用嘅《刷牙歌》，兒歌仿彿都教緊你一啲嘢，而且仲係根深蒂固，任你係咩類型嘅金魚腦都一樣記得；回想你嘅童年，令你最深刻嘅兒歌又係邊首呢？係有返咁上下歷史嘅 《一支竹仔》定係卡通片「櫻桃小丸子」嘅片尾曲《問題天天都多》？
可能你會問《一支竹仔》就話教人團結就是力量啫，咁小丸子一味BELI BALA又教咗啲咩？其實佢都一樣有個故事講你知，歌詞除咗完美配合故事內容，仲簡潔地同你講咗「不驚會跌倒，爸媽當我寶」、「問題像一首歌，心裡天天廣播，願能問得清楚，開拓知識的果」！
依家再細讀以前嘅兒歌歌詞，確係另有一番味道，功力深厚嘅填詞人每一份詞，都可能潛移默化教識咗你一啲道理，又或者悄悄為你打氣，只可惜近年香港兒歌真係買少見少，希望將來都有機會再聽到新嘅港式兒歌！
