2017-03-24

5.6K

四月限定!海洋公園「春日歷險」 同動物近距離接觸

20170324_OCENAPARK

寓學習於娛樂一向係我哋培育小朋友最常用嘅方式,亦都係將知識傳遞給小朋友最有效嘅方法嚟呀!今次到海洋公園唔淨止玩咁簡單,晴朗參加咗全新推出嘅教育活動——歷險探索系列之「春日歷險」。一齊嚟深入探索海洋公園遊人止步嘅幕後地方,睇下佢哋嘅歷程有幾緊張刺激囉!

 

未出發先興奮!晴朗好期待今次嘅活動,一大清早就到達海洋公園喇!真係未見過正門一個人都冇㗎!證明我哋真係好早啦!

 

負責我哋今日活動嘅係穿著制服嘅「米粉姨姨」,姨姨就好似有一種無形嘅吸力一樣,啲小朋友好自然就吸晒埋去喇!

 

即將乘搭晴朗好喜歡嘅海洋列車,入去囉!gogogo~~

 

車程雖短,但小朋友你一言我一語,大家已經變得好投契,仲friend過打band添喇!

 

嚟到探索隊基地,米粉姨姨先同大家嚟一啲熱身,然後互相認識一下。

 

跟住就展開緊張刺激嘅遊戲,每組隊員要鬥快揭開屬於自己組別顏色嘅板塊,限時內揭得最多果組為之勝利。睇下朗朗幾咁落力。

 

一班探險隊隊員開始四出歷險喇!第一個探索對象係海象,米粉姨姨沿途為大家介紹海象嘅知識同觀察佢哋嘅泳姿,小朋友都睇得好雀躍呀!

 

之後就去咗睇雪狐,剛巧遇上職員餵梗佢哋食早餐,好好彩!第一次見雪狐乖乖一個跟一個坐定定,按指令轉圈畀我哋睇。真係大開眼界~

 

接住落嚟就到雪鴞,可以咁近距離觀察雪鴞都係第一次。勁興奮呀!

 

仲可以同雪鴞影番張合照添!好開心!cheers~

 

一連串嘅觀察活動都消耗咗唔少體力,探險隊返回探索基地放小息,食番啲乾糧補充一下能量。晴朗已經同米粉姨姨玩到熟晒,仲圍住佢兜圈,搞到姨姨頭都暈埋添!

 

之後每個隊員獲發一個袋,用嚟裝玩遊戲嘅錢幣嘅!仲有一本探險記錄冊添!隊員如果能夠展現相關技能同特質,就可以獲得唔同級別嘅星星獎㗎喇!

 

挑戰一:限時鬥快搵出指定嘅物件同數量,好緊張呀!

晴晴好開心攞到2星獎。繼續加油!

 

冇晒錢幣?唔緊要!只要做到指定動作,又可以獲取更多錢幣喇!

 

挑戰二:限時將波拋入海象口內,拋到5個或以上就可以攞到3星獎。

小朋友務求攞多啲星星,都玩得好認真投入。一於全力以赴,做到最好啦!

 

挑戰三:限時用鉗子將紙箱內嘅魚夾出來,紙箱內機關重重,想攞到3星獎唔係咁易㗎!要畀啲耐性慢慢夾先得。

 

挑戰四:按圖做出不同嘅動作

既可考身體協調性,又玩得開心,好好玩!

 

上午嘅挑戰告一段落,由於各隊員都全力應付不同挑戰,所以每人都獲頒徽章以示獎勵。得到好多星星獎同徽章,滿足感爆燈呀!

 

午餐時間又嚟到我哋熟悉嘅冰極餐廳,今次試多咗好多款食物!好好味!好滿足!食飽飽,我哋已經充滿力量喇!

 

然後向海洋奇觀進發!以下落嚟應該係小朋友最期待嘅環節——預備特製魚啫喱餵飼海洋奇觀啲魚魚。職員預先用海藻同魚碎撈埋,加熱水之後就會凝固成一塊塊枱上啡色嘅啫喱㗎喇!

 

然後用形狀模吸落去啫喱度,脫模後就完成!

 

由小朋友製作嘅形狀啫喱好可愛,可以拎去餵魚lu~

 

小隊員一個跟一個餵魚魚,熱切期待嘅一刻來喇!畢起自己親手整嘅愛心啫喱先!

 

晴晴嘅笑容足以話畀大家知佢係幾咁期待啦!

 

嘩!吸引咗好多魚游埋嚟搶食呀!將啫喱掉出,雖然只係一刹那嘅光陰,但已經係一個好深刻嘅體驗嚟喇!

 

米粉姨姨帶隊繼續向各隊員介紹海洋知識,大家都好專心聆聽,仲不時發問一啲「十萬個為什麼」嘅問題。小朋友真係好可愛呢!

 

去到另一個探索隊基地,又要做啲運動熱熱身,要預備好強壯體魄去接受下午嘅挑戰呀!

 

挑戰五:限時釣魚,如果釣到7條或以上就可以攞到3星獎。

朗朗釣咗6條,攞到2星獎都好叻啦!繼續加油!晴晴釣咗5條已經好滿足,非常開心?

 

挑戰六:先從袋裡抽出一件物品,然後從紙箱內找出相同嘅物品,又係限時㗎!

晴晴3秒就已經搵到相同物件。勁呀!可以獲得3星獎。

 

挑戰七:在指定時間內穿越機關重重嘅障礙通道,晴朗響呢個環節都攞到3星獎。食飽咗真係唔同啲喎!

 

挑戰八:限時圈出指定數量嘅物件,睇到眼都花,但小隊員仍然好有毅力,挑戰至最後。

 

所有挑戰經已完成!米粉姨姨同咩咩姐姐召集各隊員,進行嘉許同埋頒徽章喇!

 

畀人讚就梗開心啦!仲可以獲得專屬於自己技能嘅精美徽章。小朋友得到好大鼓勵,要繼續努力發展自己嘅個人特質呀!

 

「星學動物探索隊」任務完成,真係好感謝全程悉心照顧嘅米粉姨姨同咩咩姐姐呀!

 

晴朗咁努力完成任務,當然要獎勵一下啦!就去佢哋至愛嘅威威天地盡情地玩吧!

 

快樂嘅時間過得特別快,又係時間講拜拜!節目實在太精彩豐富,雖然玩得好攰,但好開心呀!今晚一定好好瞓!

 

真係令我哋大開眼界呀!不但可以深入少為人知嘅職員專區,仲通過咗好多條秘道去到不同場館添!可以近距離同唔同嘅動物會面,實在太令人興奮喇!職員專區內都好注重清潔,製作魚啫喱同餵飼前後都需要洗乾淨雙手,就連腳都需要踏過一個小盤以消毒鞋底,可見海洋公園對衞生要求好嚴謹。好欣賞職員全程對小朋友嘅悉心照顧,仲會細心觀察每位隊員,響最後嘉許徽章嘅環節講番晒各隊員嘅特質出嚟!好佩服!換轉係我,肯定連小朋友啲名都記唔到呀!

 

晴晴最喜歡嘅係餵魚魚環節,而朗朗最開心係頒發徽章時刻。從小挑戰中,可以訓練小朋友嘅身體協調、創意同解難能力。課程後,不但增強咗小朋友嘅自信心、溝通能力同人際關係,仲認識多咗動物同埋環境保育嘅知識添!

 

「歷險探索系列」同過往海洋公園所舉辦嘅活動好唔同,以「經驗學習法」及「自然遊樂」兩大教育理念為基礎。接觸大自然有助提升小朋友嘅學習動機,而通過實踐活動仲可以更有效鼓勵小朋友透過主動觀察、發現及反思中學習添!課程簡直係將小朋友同大自然連結埋一齊呀!精彩豐富又不設規限嘅「開放式活動」,相信一定能夠提升小朋友嘅自信心及解難能力。

 

我哋參加嘅係「星學探索隊」濃縮版本,正式活動將會分三天進行,家長無須陪伴上課。由於係期間限定,只會在四月開辦。最後一天嘅畢業禮將會邀請家長出席,一同分享小朋友嘅學習成果。

 

「春日歷險」共有兩個唔同程度嘅課程,我哋呢個係主要為四至五歲幼童而設嘅「星學探索隊」。大啲嘅可以參加以六至八歲為目標嘅「童遊動物探索隊」。再大啲更可選擇專為八至十二歲而設嘅兩日一夜恆常活動「夜遊海洋歷險記」添!聽到兩日一夜已經覺得好刺激喇!所有活動已經開始接受報名,大家都快啲幫小朋友登記,把握與大自然接觸嘅好機會啦!

 

海洋公園・歷險探索系列

報名詳情:按此

 

【編按:以上內容為作者之個人意見及立場】

相關文章

【跟住小編做媽咪】小編分享小朋友放電心得 Playgroup興趣班大公開!

【附報名詳情】本地雪糕廠開放親子參觀 體驗製作雪糕及試食 

集合吧小廚師!結合STEAM及AR科技 從烹飪培養孩子多元發展 激發創意潛能 12大暑期小廚師班

【親子好去處】兒童書展暨超級親子用品展 5.17開鑼 免費玩充氣樂園

緊貼新冠肺炎最新相關資訊