小小豬郊遊記：大坳門

11月頭的天氣好得實在有點過份，老公就建議帶我地去郊外行下親親大自然，所以我地就向大坳門出發啦！

大坳門位於清水灣，之前都嚟過好幾次，基本上都熟晒啲路，不過依隻豬仔總係鐘意睇地圖，話要搵定個靚位

其實我地都係去山頂位置，睇下風箏自由自在係天空上飛

不過，今日我地冇帶風箏，冇得一齊玩添

上幾次嚟都唔覺有依啲草草，雖然只係簡簡單單，但一大片草草隨風飄飄下，又真係幾靚呀

嚟到我地嘅目的地，小小豬就急不及待除左對鞋，係片草地上行嚟行去

係呀...小小豬就係有依個習慣，一去到草地...沙地...或者郊遊地方，佢都一定係會除鞋仔。雖然草地都有可能會有石仔依啲潛在危險，但俾佢親身感受地上嘅唔同嘅感覺，都係一個唔錯學習方法呀！

由於今次郊遊事出突然，所以都冇乜帶玩具嚟玩，好在平日都有少少小玩意係DADDY車上，所以都有得玩下。

係我地玩緊波波時，見到有一班姐姐係我地前面嘅樹影相，見佢地影嘅位置又幾靚，所以我地又嚟跟風影下先

影完相隻百厭豬仲意猶未盡，話要學爬樹。我地都係安全同埋唔影響大樹情況下，俾佢爬少少

動態過後，大家齊齊坐定定休息一下，睇下風景吹下山風，真係好RELAX呀

天氣再配合埋環境，真係舒服都唔想走，如果唔係之後仲有節目，我想我地仲有排坐呀！

依度我地嚟都好方便，小小豬又好鐘意，所以等天氣啱時一定會再嚟，係咁舒服環境下，人都開心精神啲嘛！