終於放新年假，可以帶埋小朋友去旅行喇！不過旅行先係最考驗媽媽EQ嘅時候，真係要好好計劃吓先可以「出入平安」，唔使驚喺異地潑婦罵街！ 睇吓以下6個tips，做好準備先出發！
1. 準備機上消磨時間玩意
坐飛機時簡直係困獸鬥，精力充沛嘅小朋友要留喺一個狹小嘅空間，真係唔容易架！為咗令佢哋可以坐定定，聰明嘅媽媽就要帶定可以吸引小朋友注意力嘅小玩意喇。Lego、畫具、泥膠、故事書都係唔錯嘅選擇！
2. 盡量畀小朋友係飛機上舒服啲
媽媽可以視乎小朋友體重，向航空公司預訂嬰兒籃。只要未過規限就可以，年齡唔係問題！另外網購定充氣腳枕等裝備、準備定最愛嘅零食果汁，等小朋友喺機上有五星級嘅享受～
3. 預先溝通
小朋友去到完全陌生嘅地方，都會覺得緊張。所以媽媽可以預先同佢哋綵排，講好上到飛機要坐幾耐，期間有咩做，仲可以問下小朋友想帶邊啲玩具去玩！小朋友有心理準備，扭計嘅機會都會細啲。
4. 選擇可以上飛機嘅BB車
如果小朋友仲細的話，用摺疊後放到喺手提行李櫃嘅BB車，就可以一路推到上機，BB扭抱都唔怕喇～
5. 管理情緒
媽媽嘅情緒都會感染到小朋友，如果旅程中一直好緊張或者暴躁，咁大家都會唔開心。作為帶領住小朋友嘅角色，不妨嘗試隨遇而安，唔完全跟隨計劃可能反而有驚喜！
6. 最緊要享受
最後記住記住，今次係去玩呀！趕唔到行程，或者有冇甩漏都唔緊要，最重要係享受同小朋友去探索一個新既地方，把握呢個咁難得嘅機會！
