女人語 Archives - BK Milk ‧ 親子語
 

Posted on August 16, 2018 By

「唔好攪呀,姐姐鬧㗎!」
「再嘈司機叔叔掉你落車架喇!」

早幾日Forum有人開Post話覺得「唔好攪呀,姐姐鬧㗎!」呢類說話難聽過粗口,樓主以前做過零售,經常有家長教仔女時拖埋佢落水,令佢覺得好反感:「點解要屈我?我冇鬧小朋友。」佢覺得家長應該直接向小朋友指出件事本身係錯,而唔係用後果「其他人會唔高興」嚟恐嚇佢。

Juicy媽覺得樓主都幾有道理,家長教仔時用個陌生人嚟恐嚇細路,以為可以嚇窒小朋友唔敢再犯,但有網民覺得句嘢成個價值觀放錯重點,如果因為姐姐會鬧,所以唔應該攪人哋啲嘢,咁係咪即係姐姐見唔到或者唔會鬧就可以攪?

亦有網友突破盲腸,話句說話本身冇指出件事係啱定錯,意思彷彿「其實阿媽就冇所謂嘅!不過人哋唔鐘意咋!」咁咪變相冇灌輸到正確價值觀畀小朋友囉……?

不過,有網民就認為,其實大人行街都會掂舖頭啲嘢啦,小朋友好奇伸手摸都係人之常情,「摸一摸」呢件事本身冇錯嘅。Juicy媽就覺得,摸唔摸得呢個問題要睇好多因素嘅,但今次討論嘅重點應該擺喺父母教仔嘅表達方式度,而唔係討論個別做法啱定錯。

 

圖片來源:謝曬皮 Facebook

 

「你唔努力讀書,就好似個姐姐咁做收銀架喇!」
「你唔乖,我打畀校長架!」

好多爸爸媽媽都鍾意用呢類說話嚟教小朋友,本地插畫家謝曬皮都出過Post講佢有次搭車,隔離有個阿媽借佢過橋鬧小朋友:「你咁曳,姐姐笑你喇!」呢個教育方式,可能係想利用第三者或者群眾壓力令小朋友覺得羞恥,或者真係可以立即見效,但只係一時三刻,當「人哋」行開咗,小朋友又會重蹈覆轍。而且呢個方法係拖咗無辜嘅第三者落水,令人哋「躺着也中槍」……

有心水清嘅網友就話,教小朋友係應該係教佢一件事嘅本質啱定錯,而唔係淨係用個後果嚟恐嚇佢。確實又真係,自己的孩子應該自己教,人哋冇義務幫你做醜人「教仔」……又或者,某啲情況下可以換個講法話「你再咁曳,撞到姐姐喇!」等小朋友明白唔可以做嗰件事係因為會影響到其他人,等佢學識為他人着想。

入討論區一齊傾


Posted on August 15, 2018 By

嗰日Forum有人話見到有對父母推住BB車衝紅燈,跑住過馬路,期間不遠處有架巴士駛緊埋嚟,好鬼牙煙!咁心急以為對父母好趕時間啦,點知過完馬路就慢慢行……真係吖!相差得嗰十幾秒會死咩!好心做咗阿爸阿媽就唔係攞BB條命嚟博啦,點做人父母架!

 

睇埋啲留言,就知其實唔只父母,爺爺嫲嫲公公婆婆先係最常拖住粒孫衝紅燈嘅「危險人物」。啲老人家成日恃住自己一把年紀啲車會讓佢,所以明知就嚟轉燈都照衝出去,嗌極都唔聽!

 

但其實,點解會覺得啲車一定會人呢?如果調返轉,啲司機都有衝習慣又或者真係好趕時間,到時出咗事,啲小朋友咪好無辜?細細個返幼稚園都有教啦,馬路如虎口,其實香港啲交通燈已經唔算等得耐啦,點解等多十幾秒都唔得?

 

又,啲人所謂嘅「趕時間」,到底係有幾趕,趕到要搵命博?有留言話「我成日同仔女講,我哋唔趕,條命好矜貴」,Juicy媽好認同呀!香港係出名全球行得最快嘅物種,個個外國人嚟到都話香港人行路好似跑步咁,嗱,未做人阿爸阿媽你鍾意行幾快、衝幾多紅燈都冇所謂,自己的生命自己負責返,但如果湊住小朋友,真係唔該你遵守交通規啦!小朋友係無辜架囉!

入嚟討論區一齊傾


Posted on August 9, 2018 By

事緣喺forum有新抱話,個仔出世時工人姐姐仲未上手,所以請奶奶同住幫手睇小朋友。而家過咗一年工人姐姐有能力照顧小朋友喇,就煩惱緊點請奶奶返自己屋企住。部份網民覺得樓主十足十打完齋唔要和尚,當奶奶工人咁呼之則來、揮之則去。 全文…

 
© Baby-Kingdom.com Limited. All rights reserved.