我家兩位老細都係雞腳愛好者,我就鍾意食煲湯木瓜,所以今日依個湯都可以話一次過滿足晒我地三口子呀!
材料包括有: 木瓜1個、雞腳12隻、豬展約40蚊、紅棗10粒、果皮1塊、花生及眉豆約5蚊!
洗淨雞腳,用刀批走黃色鱗片,切去腳甲!
木瓜去皮及去瓤,然後切件!
果皮浸軟刮囊,紅棗洗淨去核,花生及眉豆洗淨!
將雞腳及豬展汆水約1分鐘後撈起!
煲內加入約3L水,然後加入先果皮!
煲滾水後,將各材料放入再煲滾(除雞腳外)!
待再煲滾後加雞腳,然後改用細火煲約1.5小時!
最後落鹽調味!
好味嘅木瓜眉豆花生雞腳湯就有得飲啦!
哈哈哈...依個湯除左好飲之外,亦都可以代替左一個餸,因為啲煲過湯嘅雞腳特別好味,而且又淋身啲,啱晒小小豬食呀!
依個湯除左好飲好食之外,亦都非常啱女仕們飲用,因為雞腳又會勁多骨膠原同鈣質,而且木瓜又含豐富维生素C及多種營養,最好就係材料簡單又唔貴,所以有時間都要煲多啲先得呀!