你嘅婚姻有出現到小三嗎?
自從和牛B出世之後，我同老公嘅目光、焦點都完完全全放晒喺和牛B身上。
而我所講嘅小三，就當然係我哋嘅心肝寶貝和牛B啦~
老公就比我更加愛和牛B啦，正所謂女兒係爸爸上一世嘅情人。
所以牛爸對和牛B就一定係呵護備至，全副心機同愛都俾晒和牛B咁濟啦。
不過，和牛B對牛爸嘅愛。都有o架，但佢就好似我哋大人對愛情咁，一淡砂糖，一淡屎咁孝敬牛爸。
好嘅時候，會好似隻愛情鳥咁，成日都要錫爸爸。
乜都會嗌爸爸，指明要爸爸幫佢做啲乜、要爸爸陪佢玩。
而我所講一淡屎嘅時候就係，和牛B通常都比較痴住我，痴爸爸嘅時段都會比較少。所以有時佢會同牛爸講「唔要爸爸」，手拖手時間「我唔拖爸爸」(一手撇開爸爸)…「我唔鍾意爸爸，鍾意媽咪」(真係直插牛爸嘅心)
當最強小三出現咗之後，二人溫韾嘅照片無咗，就只係得返三人合照。
你睇下，就連溫韾騎馬仔都無我份，被冷落嘅我唯有喺前面做攝影師啦 
仲有就係牛爸為搏紅顏一笑，佢都會傾盡全力去…玩攤位遊戲，為嘅就係要贏隻Peppa Pig俾和牛B，換取佢嘅快樂同一笑。
佢哋好嘅時候，真係痴纏到你頂唔順。
最唔好嘅時候，就係和牛B鬧情緒最終被牛爸鬧到喊晒嘅收場囉。
不過無論點都好，呢個小三最強嘅武器就係死纏住你，同埋帶住甜絲絲嘅笑容走埋嚟又或者衝過嚟愛的抱抱你。
呢啲招我哋真係招架唔住o架~
