時候同朋友閒聊傾偈都會衍生出一啲只有拍戲先會出現嘅情景題，大家拎出嚟幻想下，傾下如果面對呢啲兩難局面，會唔會有啲有趣嘅解決方法，好似男士們最常被問到嘅「阿媽同老婆齊齊跌落海，你會救邊個先？」，無論答案係點，其實講出嚟都係得啖笑。
早前就有JM以兩位朋友嘅生活寫照，諗到如果要喺朋友運同夫妻緣之間，作出二揀一嘅決定，又應該點算好呢？基於假設題法則，無如果，一定要揀，最後夫妻緣以壓倒性票數勝出，真係恭喜晒！
但係其實無論基於咩原因，都好似無咩理由唔揀老公，朋友會有朋友嘅家庭，朋友會隨住大家人生階段轉變而轉換，即係唔係話要講再見，只係唔可能跟得咁貼，所以唯有老公先係最貼近自己生活步伐，或者彼此影響，同步繼續行落去。
而且做人有時都幾公平，每人每日都係得24小時，你點樣分配，如何去經營，自然相對收返幾多「緣份」，假設你平日樂於助人，到遇到問題嘅時候，朋友自然就會仆出嚟幫忙啦，所以某程度上，同兩公婆感情好唔好，好似無直接影響。
至於另一半，其實喺大家婚前相處，就應該了解彼此生活模式，無人話一定要糖黐豆先叫愛嘅，當然都有啲人，係婚前婚後兩個人，覺得女友變咗老婆就係「屋企人」，又或者自己FF婚後會有唔同嘅機會啦。
而我嘅結論係，結婚誓詞真係字字珠璣，唔係亂咁講！
