點樣戒片？幾歲應該戒片？個個家長都有唔同講法，無一套標準方程式。正因為咁樣，家長就會心急咗，甚至會因為小朋友戒唔到片而打打鬧鬧。有網民喺討論區求教，話教到好沮喪，三歲仔都係唔肯去廁所大便，好多網民討論傳授戒片方法，大家一齊睇下有咩方法！
媽媽陪住你大法
原來有好多小朋友係因為怕跌落廁所而唔敢去poopoo，就算有小朋友size廁板都一樣，因為克服唔到對廁所窿嘅恐懼！如果每次小朋友去廁所都有家長陪住，就會安心好多啦！有好多家長都有試過拖住小朋友poopoo，令小朋友克服對廁所窿嘅恐懼，真係好sweet啊！
講故事大法
要讚下呢位家長，用咗一個好cute嘅方法演繹《便便的故事》，令到小朋友明白要解放poopoo，送佢哋出海游水！網民話：「我就氹佢啲poo好想去游水，你帶佢哋去游水啦，沖廁都係比佢襟，同poo poo講bye bye，叫佢哋去游得開心啲」呢個講同poo講bye bye然後先沖廁嘅習慣，真係好可愛！我諗起細個睇嘅屎撈人卡通啊！
同廁所仔/廁板做好朋友法
小朋友對於自己個廁所仔/廁板會有情意結，令佢哋感情好啲，Poopoo嘅時候會想起，玩嘅時候都有廁所仔陪住，戒片會容易好多！有位媽咪就試過：「唔坐就放喺當眼方便嘅位置，唔駛迫佢坐（我開頭都迫佢嚇親佢）放一段時間佢會自己攞黎坐下玩下，攞啲玩具扮下去廁所」；仲有媽咪話：「我當初都係帶佢買隻佢鍾意既卡通廁板，初頭比佢日日攬住，fd咗就放上座廁教佢用！」不過用過就最好唔好攬喇…哈哈！
佛系戒片法
又佛系？！無錯啊！原來有唔少家長都係用緊佛系戒片法。有網民就提到自己唔會夾硬幫小朋友戒片，怕未Ready就戒片會有負面影響。「我會同佢講：你準備好就話比媽媽聽，咁以後就唔著片。我有兩個小朋友，每次都係佢哋同我講：媽媽，我唔想著片了。」有好多網民都好認同，話自己小朋友都係突然間話要自己去poopoo！咪就係緣份到了，自然會戒咗片，咁樣就唔會令自己太大壓力啦！
注意！千祈唔好因為去廁所問題而打鬧小朋友
有家長提醒，如果小朋友因為去廁所問題而被鬧，就會令到佢有便意都唔敢去，久而久之，就會習慣忍便便，搞到便秘，到時就大件事喇！
即刻入討論區一齊傾
