【蕭栽見聞】老老實實，「警察叔叔嚟拉你！」依句說話，我由細聽到大，到我而家都到咗中女嘅年紀啦，偶爾都仲喺街聽到啲家長咁嚇個小朋友。
小朋友喺人舖頭周圍跑，家長講：「再跑警察叔叔嚟拉你！」小朋友搭車時踢人椅背，家長講：「再踢警察叔叔嚟拉你！」小朋友喺餐廳大嗌，家長講：「再嗌警察叔叔嚟拉你！」喂，其實可唔可以畀啲創意架？次次見啲家長咁講完之後，個小朋友都係繼續走、繼續踢、繼續嗌架喎！咁代表咩呀？咪即係依句唔work囉！
講真丫，我細個初初聽到阿媽同我講「你再曳警察叔叔就嚟拉你！」嗰時真係淆淆哋，即刻乖乖收聲，but，當依招用多幾次，而我發現警察叔叔係永無出現嘅時候，就真係睬你都傻啦！我細個唔識咩叫「浪費警力」咋，識的話我一定會叫阿媽咪煩住D差人，咪俾人拉嗰個係佢！
都明白D家長咁講，無非係想制止小朋友，唔好再繼續騷擾人嘅行為啫，但講「警察叔叔嚟拉你！」，嚇得個小朋友一次都嚇唔到第二次啦 (尤其而家啲小朋友咁醒)，既然係咁，點解唔試下用其他方式講呢？講：「你再曳我哋就即刻返屋企！」都好啲丫，至少你真係可以帶佢返屋企丫！
(以上純粹蕭栽個人見聞及感想，如有冒犯，請你食飯。)
*********************************************************************
大家有無D制止小朋友喺公眾場合做出擾人行為嘅心得？不妨一齊分享下！
Image courtesy of Sunnyha Images/ Moment Open/ Getty
