我哋細個果個年代，想聽故事，最多都係打電話聽㗎咋！父母邊得閒同我哋講床邊故事丫？而家啲小朋友真幸福，原來巿面已經出咗唔同款式嘅故事機。每個小朋友嘅童年，都應該要有經典童話故事陪伴成長加嘛！就等我哋帶大家重拾童年，一同走進童話世界啦！
除咗故事機，仲有啲圖書都值得推介！不過唔駛急！我會逐一為大家介紹㗎！^^
包裝精美嘅故事機，雖然係話適合三歲或以上幼兒使用。但係晴朗都愛不釋手呀！特別係晴晴，無論係食早餐、閒時、刷牙、臨瞓前都機不離手，出街都袋埋落小背包，可想而知故事機嘅吸引力係幾咁強大呢？
事不宜遲，簡單介紹一下部機先！故事機總共有20個廣東話故事，包括咗「閱讀」、「故事」同「兒歌」模式。晴朗佢哋最常用係「故事」模式，按下唔同故事按鈕就會有唔同童話故事聽㗎喇！晴晴最鍾意係《漁夫和金魚》，而朗朗最鍾意係《三隻小豬》。其次係「兒歌」模式，每個故事都設有屬於自己嘅兒歌，每首都輕快又易唱，而且唱梗果陣部門仲會閃閃發光㗎！晴晴已經入晒腦，聽佢成日唱，就連我都識唱埋一份喇！至於「閱讀」模式，我都好鼓勵佢哋翻開跟機本手冊邉睇邉讀故事，可以幫助認讀中文字。有咗故事機，晴朗媽媽翹埋雙手，晴朗都有故事聽喇！XD
產品詳情：https://www.facebook.com/parentclubhk/videos/2151979324901012
我哋買故事機嘅時候，亦被一啲圖書所吸引，同我哋平時睇開果啲好唔同，好有趣！以下落嚟，為大家逐一介紹~
《我的百變馬桶》
故事係講一個小朋友所想像出唔同款式嘅馬桶，每款都各具特色，好有趣亦都好有創意㗎！
如果馬桶變得又軟又滑溜，咁我哋就要保持平衡先用得到。如果馬桶變得超級高，好急嘅時候，又會唔會趕唔切呢？每一款都好好笑，亦都夠晒創意！最後仲為唔見咗馬桶而展開刺激有趣嘅馬桶之旅添！唔好睇少呢啲創意，話唔定會造就第時嘅gucci, chanel設計師2.0㗎！
《你知道的吧！》
故事教小朋友唔好先入為主，好啱鍾意偵探、查案解難嘅小朋友，大人都啱睇㗎！
禿鷹收埋嘅肉唔見咗！請正在睇故事嘅讀者搵搵係邊個偷嘅！因為成個過程大家都睇到晒！當唔見咗嘢嘅時候，小朋友可能會因為心急而怪錯咗人，利用反面嘅故事，令小朋友知道如果只用自己個角度去諗，會產生盲點同誤會。故事結局都幾出乎意料！睇到最後會即刻揭番去最前睇下自己睇漏咗啲咩！幾好玩！原來自己笨咗！經由家長引導，可以培養小朋友以多角度思考，發掘事情唔同嘅面向，令小朋友從小培養同理心、包容力，擁有良好嘅思考習慣。
《小雪球的夢想》
想夢想成真，係要有堅定嘅信念同接受不同挑戰嘅心！
小雪球好希望有一日可以變成同大雪球一樣大。路途上，佢遇到爛咗嘅大雪球、凹凸不平嘅怪雪球同埋溶咗嘅雪球，令到小雪球好失望，亦都開始質疑自己嘅能力同目標。小雪球最終究竟可唔可以達成夢想？故事充滿挑戰同勇氣！係一本為大人同小朋友注射正能量嘅圖書！
《說謊》
媽媽你有冇講過大話呀？如果你答「冇」，就已經係一個大話啦！同小朋友一齊解開呢個看似深奧嘅哲學題目囉！
雖然大家都知道講大話唔啱！但有時美麗的謊言卻會令人感到開心。好似媽媽明明已經38歲，點解總係同人講自己25歲呢？故事透過小朋友日常生活觀察到嘅唔同情況，發現「大話」原來周圍都係！令小朋友體會到講大話背後嘅真正原因，學習「誠實」嘅重要性，鼓勵小朋友講真話，日後就唔駛再因為怕畀人鬧而講大話喇！
《動物謠言追追追2：牠們竟然是好朋友？》
自然界裏面，係咪只存在弱肉強食嘅情況？原來小動物同小朋友都一樣鍾意結交朋友，有好多動物拍擋都會一齊生活、互相合作，甚至會合力一齊對付敵人添！
你有冇諗過點解雀仔會停響斑馬嘅上面？海葵嘅觸鬚點解唔會傷害小丑魚呢？鯊魚點解唔會食咗身邊嘅細魚？都係因為互相存在住利益關係，佢哋會為咗生存或者搵嘢食而互利結盟。自自然然就變成咗好朋友喇！小朋友可以學習欣常自己同別人獨特之處，亦認識到冇人係完美嘅！總會需要人哋幫忙嘅時候。體會到人同人團結合作可以有更大力量嘅道理。仲可以將互相合作嘅正向思想，套用到去實際社交關係添呀！
《親愛的恐龍》
原來恐龍都會同你通信㗎！啱晒鍾意恐龍嘅小朋友呀！
故事中，男主角終於可以到博物館參觀，但點知快將到收館時間，男主角唯有透過書信，去了解恐龍嘅日常事情。只要你一開始睇，就會一封又一封信追住睇落去。唔只因為男主角同恐龍每封往來書信嘅內容吸引，書中仲有好多立體設計，好得意有趣！小朋友一定會鍾意呀！
恐龍大變身雙書組：《工程龍大集合》及《工程龍尋寶去》
鍾意恐龍，又鍾意車？可以一次過滿足晒兩個願望！恐龍化身成為工程車，一齊分工合作，各自發揮所長、同心協力，最後仲會有大驚喜㗎！可以認識唔同功能嘅工程車之餘，又可以滿足小朋友鍾意恐龍嘅期待，恐龍迷又點可以錯過呀？
《奇幻小鎮大發現》：現代世界+龍的時代+西元3000年
冇字嘅繪本可以訓練小朋友觀察力、思考力同聯想力！每本故事都有唔同角色，而每個角色有著各自嘅故事。今次翻開書睇一個角色嘅遊歷，下次翻開就睇第二個、第三個....揭嚟揭去睇極都唔會厭！同一個角色又可以用唔同方式去演繹，點樣演繹由你決定，係好好玩嘅遊戲書嚟呀！
在機緣巧合之下，參與晴朗學校嘅講座，認識咗「家長會」。肥哥哥風趣幽默、生動活潑嘅講故事方式，令在場家長都聽得投入，仲好好笑呀！家長們唔只輕輕鬆鬆聽故事，仲認識咗講故事技巧同埋唔同類形嘅圖書。睇完一本圖書唔一定要帶出故事教訓先為之好書，有好多其他種類嘅圖書可以引發小朋友想像力同創意，仲可以當遊戲咁玩添！真係獲益良多！忍唔住一定要同大家分享！
最意想唔到嘅係，佢哋嘅價錢比起我訂開台灣圖書嘅網站(香港二樓書店)仲要平！響「家長會」購買9件或以上，就可以享有原價63折優惠！所以我哋訂購故事機嘅時候，一併訂埋其他圖書，價錢真抵好多呀！大家可以不妨搵多幾間書店格下價丫！其實故事機只係多一個引發小朋友感受閱讀樂趣嘅機會，爸爸、媽媽都要繼續把握陪伴閱讀嘅珍貴親子時光呀！希望大家都可以透過購買平靚正兒童圖書嘅渠道，讓小朋友從小就培養喜愛閱讀嘅習慣啦！
家長會 Parent Club
地址：長沙灣廣場二座503至4室 (荔枝角港鐵站A出口)
電話：6712 1525
facebook: https://www.facebook.com/parentclubhk
營業時間：星期一至五 (10:00am - 8:00pm)，星期六 (10:00am - 5:00pm)，星期日及公眾假期休息
