轉眼間小JM已經接近八個月大了，加固情況亦很理想，可能係因為小JM本身都係一隻「為食豬」，所以好願意嘗試唔同嘅食物。
喺小JM 六個月大嘅時候，媽咪我就開始為小JM打好加固嘅基礎，慢慢由米糊開始，漸漸地變成而家可以食粥仔，甚至可以令小JM以粥仔代替到一餐嘅媽媽奶。
上回提到究竟幾時應該開始加固；點樣加固同有啲咩要注意嘅地方，今次就不如講下點樣為BB準備第二階段嘅加固啦。
因為小JM比較為食，所以佢未夠七個月嘅時候就已經開始轉食稀粥，為咗想令小JM食得更滿足，所以媽咪買咗個多功能燉煲來整粥仔俾小JM食。
至於點解買呢個燉煲，其實都有幾個原因嘅：
1. 除咗係燉盅之外，仲有煮BB粥嘅功能，又可以蒸煮，亦可以保溫，真係一物幾用
2. 價錢合理
3. 深得各大媽媽們推介
所以媽媽我又點可以唔買返個來用呢 。
當BB踏入七個月嘅時候，就意味著BB已經可以進入第二階段嘅加固期，呢個時候媽媽們就可以為小B預備各種不同種類、不同質感同味道嘅食物作嘗試。但媽媽們都需要謹記，每個小B嘅加固進度都會有所不同，所以切忌太過於急進，以免嚇怕咗小B就唔好啦！
雖然小JM已經進入第二階段嘅加固期，但媽媽奶仍然係小JM最愛嘅主要食糧。而家小JM嘅每日進食進度如下：（進度只供參考）
08：00 媽媽牌
12：00 媽媽牌
15：30 媽媽牌
19：00 粥仔 （一碗半）
22：30 媽媽牌
因為小JM已經開始咗加固，所以媽媽都日俾返少少水／果汁溝水俾小JM飲，以促進腸道運作，Keep住有Bubu。
雖然而家在職媽媽一般都比較忙，甚至要早出晚歸，但為咗小B嘅健康成長，相信好多媽媽們都會不惜勞苦咁為小B準備美味嘅食物嘅，至於點解推薦自家製，其實都不外乎以下幾點：
．自家製比較經濟實惠一啲，而且食物會較為新鮮，對小B而言更為健康
．自家製食物可以隨小B口味而改變食物嘅味道同口感，以更符合小B嘅口味，增加小B食慾
．自家製可以有助媽媽們了解小B嘅口味
為小B們煮食有幾大陣象？
其實為小B們準備食物分分鐘可以話「大陣象」過煮一餐飯，因為要準備嘅用具都唔少架。除咗平時一般嘅煮食用具之外，不如又睇下有啲咩會用到：
1. 食物處理器／攪拌機
2. 蒸煮鍋
3. 燉盅
4. 有蓋嘅冰模
5. 密實袋／保鮮袋
6. 食物剪（小B專用剪是也）
當然仲有啲碗碗碟碟之類啦，都係小B們專屬用具之一。
當預備好晒要用嘅器具之後，媽媽們就可以準備為小B準備食物，其實除咗粥仔以外，Finger Food都係一個唔錯嘅選擇來架。
何謂Finger Food？
Finger Food即係手指食物，當小B進入第二階段加固期就已經可過透過Finger Food來訓練小B慢慢自己進食，雖然距離正式可以自己進食仍有一段距離，但媽媽們可以透過 Finger Food 來鍛練小B學習用手指拎起食物放入口進食，Finger Food不單可以幫助鍛鍊小B手指嘅靈活度，更可以提高小B進食嘅樂趣，仲可以俾小B嘗試觸摸不同質感嘅食物，增加觸感。
溫馨提示：
記得為小B穿著上易於清洗嘅衣物，或者鋪好晒地墊先試，唔係就會整污糟晒啲衫同地方架啦。坊間亦有一啲可重用／即棄嘅餐墊、圍巾同食物圍兜可以幫小B們避免整污糟衫同地方架。
點樣整Finger Food呢？
先將新鮮買返來的蔬果或肉類切底洗淨，切成粗條狀，以方便小B們拎起來自行進食。切好之後就可以放入滾水中烚，肉類需要完全熟透，蔬果則烚至稍微軟身就得架啦。
＊暫時小JM最愛嘅有呢幾類嘅Finger Food：
蘋果、梨、桃、青瓜、菜芯
喺B進食Finger Food嘅時候，媽媽媽們嘅責任就重大啦！
1. 喺俾小B進食前，媽媽們要細心檢查一下食物嘅溫度
2. 再檢查食物嘅軟硬度係咪適中
3. 親身試吃，示範俾小B睇
4. 陪小B進食，同觀察小B嘅進食情況
溫馨提示：
當小B試食Finger Food嘅時候，媽媽們都要多加留意小B，以防小B哽親，因為有啲食物會較易咬斷，以致小B誤吞而造成危險架。
除咗Finger Food之外，媽媽們亦可以花多啲心思係小B嘅粥仔度，有助提高小B進食嘅興趣，例如可以係粥仔度加入菜蓉、蛋黃、魚或肉蓉等。如果媽媽無太多時間去整蓉嘅話，可以用攪拌機幫手，又或者係坊間買現成嘅都可以架。
相關閱讀：
