原來轉眼間已經做左媽媽年半，日子真係過得好快，小JM轉眼已經歲半，亦意味著小JM已經慢慢成為幼童，唔再係「BB」... 回想起當初同小JM初次見面，感覺依然令人感動，希望小JM一路都可以健康快樂咁成長。既然到咗一歲半，又點少得要去健康院檢查呢？一歲半嘅健康院檢查依然會有評估小測試，測試完仲需要打針架！但因為我哋幫小JM 安排咗去私家診所打針，所以健康院嘅一歲半針就唔需要打！呢一點爸爸媽媽們就要留意返，要根據自己小B過往打針紀錄而安排係邊打針。 早係小JM未檢查之前，媽媽我已經聽到好多身邊朋友講解有關一歲半健康院的小測試，甚至有朋友更提及如果小B被斷定為「不合乎標準」的話，就有需要係兩歲左右再一次返健康院進行評估。雖然當下小JM媽有被嚇倒，但我依然相信小JM呢個佻皮豬係可以應付到，所以並無對小JM進行額外「訓練」，我哋相信每位小B都有自己成長準則，分別只係早或遲些少學識而已。所以小JM媽亦希望爸媽們唔好因為見到或聽到評估內容而對小B進行訓練，更唔好因為人家小B做到而要教自己小B做相同嘅事。試下俾佢哋空間自由發展，可以發揮更多無限想像，啟發更多潛在能力！
今次小JM唔駛打針，所以爸爸今日無陪我地一齊去健康院，由媽媽單人匹媽半拖半抱小JM咁出發去健康院，就等小JM媽媽為大家解說一下而家健康院嘅檢查同一歲半針需要注意嘅地方！
1. 爸爸媽媽們記得、記得、記得要帶健康院嘅手冊同針卡，以便醫生同姑娘們做紀錄嘛！（因為很重要，所以要講三次！不要嫌我煩就可以啦！）
2. 因為需要打針嘅關係，建議為小B們著上比較容易穿著嘅衣物，最好可以選擇腿部能夠解開嘅夾衣或者短褲短裙仔為佳，以方便醫護人員為小B打針。
因為小JM預約時間係朝早九點鐘，時間有啲早，所以我同平時返工時間一樣起身準備，再幫小JM換衫，準備帶小JM去健康院進行檢查同打針。去健康院前當然都不忘為小JM準備早餐啦！
健康院檢查流程大曝光：
到達健康院時，健康院嬸嬸會提示爸爸媽媽到登記處先做登記，以便姑娘安排派發籌號同安排檢查。完成登記手續就等姑娘「叫名」，便可以到檢查房為小B進行簡單檢查：磅重及紀錄（小B除鞋子，自己企上磅），之後就可以帶小B到等候區，等候面見姑娘／醫生（按需要而安排）。
小插曲：就係媽媽差唔多登記完個陣，小JM唔小心將早餐整跌咗，仲要小JM只係食左少少幾口咋。可能小JM已經知道整跌左無得食，所以都指住左個麵包話：噢！（雙手打開示意無左。）Dirty！我就唯有同小JM講麵包跌左，無麵包食係啦，好彩小JM都無扭計，仲肯乖乖地坐定定俾媽媽清潔返好個地方。媽媽清潔好晒就再幫小JM清潔多次手仔，再俾餅佢食啦！（當媽嘅點都有兩手準備！）
與姑娘面見
姑娘將會根據小B既月齡及剛才既檢查紀錄再對小B進行評估，而評估則會分為兩部分進行：
第一部分：
姑娘會向爸爸媽媽進行提問，以便了解小B日常生活及各樣習性，問題大概：
1. 主要由邊個照顧
2. 一日會飲幾多餐奶同份量
3. 加固情況及進度：一日食到幾多餐固及每餐份量、加固嘅食物種類：如菜、肉、魚之類、茶點類型：如水果、芝士，麵包等
4. 說話能力：主要想了解小B說話能力，如小B能夠說出超過20個單字／疊字就算合格
5. 行路情況及進度：小B可以自己行走唔需要扶助
6. 識唔識得用水杯及戒用奶樽嘅習慣：要小B開始使用學習水杯
7. 正確指出身體各個部份：如 眼、耳、口、鼻、頭、手、腳、肚仔同Patpat
8. 識唔識用匙羹進食或餵別人進食：如已經懂得自行進食就已經係好叻架啦！
問完晒以上問題之後，姑娘會俾一個小小測試。
第二部分：
姑娘會預備好四粒不同顏色嘅積木，再示意小B將積木疊起。只要小B成功疊起積木就完成及通過小測試！
出賣小JM時間：係姑娘好專咁幫小JM寫緊紀錄個陣，小JM就拎起左姑娘嘅 Date Chop，可能小JM以為係玩具啦，因為姑娘將 Date Chop 放咗係距離積木相近嘅位置。姑娘有提議小JM將Date Chop交還，小JM都有示意俾返姑娘，但點知原來係撩姑娘玩，即刻又縮返收埋。呢個時候就俾另一個姑娘見到小JM笑，兩位姑娘都俾小JM攪到笑笑口，仲話小JM好攪笑。最後小JM都有乖乖將Date Chop還返俾姑娘，臨走仲有同兩位姑娘拜拜，唔係就真係失禮啦！
完成晒面見姑娘同做評估後，姑娘多數都會提返媽媽出去等打針。 但因為小JM安排咗係私家診所打，所以姑娘就有特別安排。姑娘俾定咗一個回郵信封俾小JM媽，原來係要小JM媽等小JM打完一歲半針之後將針卡嘅紀錄及正面影印及寄回，以便健康院做紀錄。最後，姑娘會提示媽媽要係小B 四歲時再預約安排驗眼，同時姑娘亦會附上預約流程俾媽媽，以作參考。而小B下一次再接種疫苗嘅時間就會係6歲，即係小B讀小一嘅時候，姑娘都有提過6歲針係會係學校打，媽媽就唔需要再特別預約。
一歲半針簡介：
健康院所打嘅係四合一加強劑，即係：白喉、破傷風、無細胞型百日咳及滅活小兒麻痺混合疫苗嘅加強劑，而呢一針特別在於打係手臂。好彩小JM今次唔係健康院打，係要去私家打返五合一加強劑（即係：白喉、破傷風、無細胞型百日咳、滅活小兒麻痺 及 乙型流感嗜血桿菌Hib 混合疫苗既加強劑），所以依然可以打大脾。
不過今次真係喊到豬頭咁囉～好彩爸爸係到呵返，一出房門口就已經無喊，仲有同姑娘講拜拜！
私家診所多數打完針都會有開定退燒藥以防萬一，以看門口之用。
完成晒打針之後，媽媽就要將有關嘅紀錄寄返去健康院做紀錄架啦！如果唔係姑娘話會不停追你添。
