疫情下家中要有足夠口罩儲備固然重要，但人人戴口罩，原來唔係人人識戴口罩，如何正確配戴絕對係防疫嘅重要一環，若然亂咁戴，嘥咗個口罩都係小事，更有機會惹「病毒上身」！
更多防疫資訊即瀏覽：防疫貼士專頁
更多文章：【新冠肺炎】醫生解答疫情FAQ 終極防疫貼士懶人包
除咗要識戴口罩，其實仲有好多嘢要注意，好似話外出進食嘅時候，口罩應該要點放置先夠衞生？用過嘅口罩又應該點處置？種種問題雖然睇落好少嘢，但每人多行一步，絕對有機會影響疫情發展！望住疫症爆發第三波，每日個本地確診數字急劇上升，真係唔到你唔驚，小朋友就話可以盡量減少出街，之但係對於上班一族都似乎避無可避，唔通為咗保護家人安全喺街連飲啖水都唔得？！
另一邊廂，經常喺街到見到人隨意扯低個口罩抖抖氣，又或者只除一邊，將口罩懸掛喺耳仔上面，其實咁樣又會唔會比起唔戴口罩更危險？
更多文章：【新冠肺炎】口罩難求！ 一文睇晒全港巿面供貨情況（不斷更新）
早前小編就搵嚟港怡醫院兒科專科醫生沈澤安醫生為大家解答有關口罩嘅各種疑難，依家就一齊嚟溫故知新，袋住呢4招戴口罩錦囊！
小編：編 沈澤安醫生：沈醫生
編：如果想飲啖水半除口罩得唔得？
沈醫生：一般最安全嘅做法係完全除下口罩，因為如果只係「半除」口罩到嘴唇下面，口部容易接觸到口罩外面部份，所以唔建議呢個做法。
另外，亦都有人可能會將口罩拉到下巴下面，整個口罩皺成一團，口罩內部好容易會接觸到外面顏色部分，當重新戴上時，就會好大機會令口鼻直接接觸到細菌，所以建議將口罩整個除下再喝水，然後才慢慢重新戴上。
編：戴口罩出街係咪就代表安全？
沈醫生：當然唔係，即使戴上口罩，但若果經常揉眼同鼻，又或者觸碰口罩，都一樣會有機會將細菌帶進體內。我哋喺戴上及除下口罩前後，都應該徹底洗手，咁先係最穩妥。
編：口罩要幾耐換一次？
沈醫生：呢個就要視乎口罩清潔度同有無整濕，有啲口罩保養得好，確實可以使用半天以上；舉例話，有啲醫院進行大手術，一次手術就係十幾個小時，所以十幾個小時唔更換口罩都係無問題。
編：如果想重用口罩，正確步驟係點？
沈醫生：除低口罩之前一定要洗手，然後要慢慢將口罩除低，留意唔好接觸到表面顏色部份；拉開掛耳嘅橡筋時都要小心，唔好彈到臉上或口罩表面，避免因此而接觸到細菌。我哋都建議將口罩對摺，但一樣要避免接觸到顏色面，然後最重要嘅係盡快洗手，免得不自覺去擦拭眼鼻口而「中招」。
重新戴上之前，一樣謹記要先洗手，小心並慢慢戴上。特別要留意鼻樑嘅鐵線部分要按壓妥當，唔好「漏氣」。口罩下半部分充分包好下巴，阻止細菌外散。最後，要再一次洗手，因為接觸口罩嘅過程可能會接觸到細菌。
