學校可以話係奠定小朋友學習根基嘅重要基礎，正所謂：「一子錯，滿盤皆落索。」作為家長，最最最想就係幫仔女考到入一間適合佢嘅幼稚園，希望佢哋將來嘅路易行啲，但如果，連選擇嘅權利都冇，又可以點呢？
早排喺討論區見到有網民開帖討論「咩類型小朋友先適合讀Happy School？」，原來樓主幫囝囝報咗好多間傳統幼稚園都落空，所以開始另謀出路，諗緊要唔要畀阿仔試吓讀Happy School，佢推測間間傳統學校都唔收囝囝嘅原因，可能係因為阿仔比較好動「坐唔定」……睇到呢度Juicy媽有啲黯然，再睇埋啲留言，原來樓主嘅遭遇並唔係個別例子，Juicy媽不禁倒抽一口涼氣，忍唔住要！爆！喇！
雖然間間學校都標榜有教無類，聲稱無論點樣嘅學生，學校同老師都會盡力教好佢哋，之但係，其實大家都心中有數，學校係會透過面試去篩選學生，最終收返嚟嘅學生，通常都係嗰啲肯聽指令，老師話乜就乜、唔識反駁嘅「乖」學生。如果小朋友天生活潑好動、容易坐唔定？咁真係唔好意思，喺香港教育制度底下，一個老師要照顧幾廿個學生，學校一定會盡量捨難取易，揀一啲容易控制嘅學生入學，「好動兒」嘅家長，一定要做好心理準備，呢個教育制度，會令你失望！
有網民留言話，既然樓主個仔比較好動，咁點解仲要揀傳統學校畀小朋友呢？揀一啲活動教學或者包容度較高嘅Happy School唔係仲好咩？冇錯，好多Happy School都標榜活動教學，少功課，多活動，而且可以訓練到思維、創意等學術以外嘅嘢，所以令小朋友讀得寧舍「Happy」，之但係有一個隱憂，就係小朋友升上小學或者中學嘅時候，面對堆到好似山咁高嘅功課，可能會比較難適應，跟唔上進度。
討論區熱話：咩類型小朋友先適合讀Happy School？
而且，Juicy媽為樓主感到不憤嘅點係，樓主根本冇得揀，佢連喺傳統同Happy 之間做選擇嘅機會都冇，因為傳統學校根本冇畀機會佢同囝囝！其中一個留言都話：「覺得好唔公平，點解要坐定定先收，咩道理！」唉，希望樓主可以睇開啲，唔好耿耿於懷太耐，繼續重新出發為阿仔另覓合適嘅學校！
點都好，教育制度衰，唔代表家長同小朋友就要甘心屈服。希望天下間多位「好動兒」最終可以入到一間佢哋真心鍾意而又讀得開心嘅學校讀書，健康快樂嘅茁壯成長，將來闖出屬於自己嘅一片天，唔好輸畀呢個冷冰冰嘅教育制度！
