講到分享鯊魚太同鯊寶嘅經歷，我諗真係不得不提考幼稚園呢一關。呢件事完全係我哋成為「家長」之後第一件最緊張嘅事，由年頭報PN班作熱身，到6月開始備戰，9月報名，11月面試，再等待結果，心情真係忐忑足成年！
準備報名期間，會驚錯過咗日子；
等出面試時間，又驚日期撞到正；
到面試嘅前夕，就驚表現唔夠好......
嚟到11月尾，部份學校都開始放榜。喺等待面試結果嘅時候，就要為失敗或者成功作準備，首先向心儀學校預備好一封充滿誠意嘅求位信；綜合網上睇到嘅資料，求位信數量最好係一至兩封，分別喺12月同1月寄出，凡事適可而止，免得比學校列為麻煩家長，而我自己就會目標一間最心儀嘅學校投信！
至於求位信內容，其實每個家長寫去都係讚間學校，咁點先有力為自己小朋友加分先？根據非官方資料顯示，面試表現當然都係最重要，至於寫信除咗可以表達家長嘅誠意，同時都等學校知道自己小朋友依然希望入讀該校。另外，若果提到加分位，首先梗係要了解該校辦學理念，清楚表達自己同學校目標一致。千祈唔好自打嘴巴，好似學校明明活動教學，你就話希望小朋友可以學識坐定定學習啦！
而寫之前不妨先問下自己以下嘅問題：
1. 真係需要呢個學位？
再次了解完學校方向之後，最好都係諗清楚呢間學校係咪真係適合自己小朋友，名校神幼都有好多種，有時候學校唔收都未必因為小朋友表現，可能真係睇到大家理念唔同，所以認清方向重點出擊，以免打擊士氣！
2. 係咪顯示到足夠誠意？
做足功課，網上有好多求位信範本，只宜參考，請勿「抄考」！
3. 內容會唔會太長，唔夠精簡？
校長每年要睇數以千計求位信，如果一味照抄返該校資料，過份吹噓，倒不如揀啲閣下真係覺得正嘅重點去寫，真係唔好怕羞。另外，若果小朋友面試當日失手，或者病咗，都可以嘗試喺呢一刻表達心聲。
4.手寫定電腦打好？
手寫會唔會更有誠意？呢個問題，鯊魚太覺得完全係睇校長個人觀感，如果手字可以，又或者方便搵到朋友替筆，咪手寫囉，若果時間緊迫，電腦打又無害嘅，最緊要都係內容清晰啫！
實戰攻略！求位信段落安排：
第一段：簡單說明小朋友名稱及申請編號，多謝學校給予面試機會，並獲得後備名額；
第二段：表達點解想小朋友入讀該學，譬如同自己家庭宗教相同，語境優良；
第三段：介紹自己小朋友優點，同時作為家長會點樣配合學校理念發展；
第四段：再次希望學校可以畀個學位自己小朋友，附上個人聯絡方法。
另一方面，提到求位信，都要講埋退位信，有啲家長手揸多個Offer，收咗先問間好唔好，其實真係仲有好多小朋友同家長心急如焚咁等緊。若果已經有較為心儀嘅offer，真係快快回覆學校或者寄封退位信畀學校退位啦！
退位信段落安排：
第一段：感謝貴校取錄小兒/小女____ 為____年度 K1上/下午班學生；
第二段：簡單同有禮貌表明已有其他offer（由於已有接送較為方便的幼稚園取錄，因此特發此信通知取消小兒/小女學位，以便貴校可盡早安排備取生入讀。)；
第三段：再一次多謝學校給予入學機會。如構成任何不便，敬請貴校原諒。
