為咗抗疫，全港學生復課無期，小朋友喺屋企可以話悶到發慌，同時亦出盡法寶將屋企變成自己夢幻樂園，特別係年紀比較細嘅小朋友，攀、爬、跑、跳樣樣齊，唔少家長為咗令仔女可以乖乖咁坐定定一陣，而換來片刻寧靜，都會出動到手機或者平板電腦等「電子奶嘴」，而且諗落小朋友又可以透過影片同遊戲中，學到唔同知識，聽落好似一舉兩得咁？
有JM最近就提到停課咁耐，小朋友少不免都用多咗電子產品，但原來呢個並唔係定律！有JM分享自己小朋友反而睇到悶，自己走去做功課？！鯊魚太聽到呢個創舉，真係羨慕又妒忌！
「更有，如果唔係有咩做咁長時間！」
「佢自己睇到驚，情願做功課同玩玩具！」
「個女3歲，應該係睇少咗電視就真。因為日日睇，睇到悶咗。寧願去摷玩具玩。」
「K1+P1 要做網上功課時先用，好少看電視，玩電腦。其他時間兩個自己玩玩具。」
討論區熱話：停課咁耐。小朋友有冇用多咗電子產品
討論區熱話：停課咁耐。小朋友有冇用多咗電子產品
講到停課停咗咁耐，有人話影響最低嘅係幼稚園學生，皆因佢哋返學都係唱下歌、 玩下遊戲，之但係鯊魚太一諗到大腦喺出世後嘅頭5年，其實係發展得最快，而且具有非常高嘅可塑性，就真係好擔心，但自己又要繼續返工，到底點先可以內外兼顧呢？
其實近年有好多研究都指出，小朋友使用電子產品時間過長，有可能直接影響佢哋嘅大腦構造同發展，令到讀寫及認知能力都比同齡小朋友差！唔單止係「電子奶嘴」，研究同時指出睇得太多電視，會令小朋友專注力不足！2至5歲嘅小朋友最好限制使用屏幕時間為1小時內，至於1歲以下更加應該完全遠離電子屏幕！而6歲或以上嘅小朋友，都應該為佢哋訂立一個時間，絕對唔可以放題式咁睇！所以停課期間，家長應該時刻 「保持警覺」，為小朋友制定有規律嘅時間表，増加親子時間，記得千祈唔好嫌煩喇！
