大家會係bb幾大嘅時候上playgroup？幾個月？一歲？唔會兩歲喇掛？我識好多媽媽都會9個月至一歲左右就俾bb上playgroup。至於我家大dir已經9個月大，完全無上過playgroup，咁啱有個同月媽媽group有人肯搞一次音樂playgroup，我梗係無放過啦⋯⋯
我玩具就買咗好多，人地俾又有好多，至於點同bb玩我就真係原來有好多野都唔知，嗰日就學咗好多同bb玩嘅技巧，可以同大家開心share，希望大家都活用技巧，同bb一齊有happy playing time~
1. 兒歌要同bb一齊唱
無論你係靚聲王定走音王，都要同bb一齊唱，因為bb最鍾意爸爸媽媽嘅聲音，即是你把聲喺bb心中永遠係最好聽嘅，所以一定要俾bb聽到你唱歌嘅聲，佢都會好有安全感架。
2. 陪做動作
無論你覺得幾低b都請跟小朋友一齊做動作，小朋友見爸爸媽媽一齊做投入感會大d，同埋bb會無咁驚架。
3. 要俾bb自由發揮
即是你可以示範俾bb睇點玩，但之後就要放低俾佢自己玩，唔好下下捉住佢隻手，甚至可以好似今次個搞手媽媽咁，預備一堆可以發唔同聲嘅樂器，由得bb自己攞嚟玩，唔好以為預備道具好似好難，其實屋企好多野都可以攞黎玩，eg 鐵碟、搖鈴etc，最緊要嘅唔係你放咗d咩係箱度，而係你放手俾bb用自己嘅方法玩（咁當然你唔好放d有危險嘅野落去任佢玩啦，同你最好就睇住佢啦）。
4. 要俾bb接觸多d不同嘅質感
其實bb可以透過視覺、聽覺同觸感受到刺激，進而刺激感官發展，所以平日俾bb玩嘅玩具最好有不同觸感，觸覺會刺激到bb的神經系統，特別是大腦的神經系統，進而產生整合和成熟化的作用。
希望你睇完都會同bb都享受親子玩樂時間，講到底，父母同bb一齊玩bb就最開心啦！
附上玩玩照片一張，咁多bb一齊玩都幾正！
