謝謝BK Milk邀請，今日我地放學之後轉戰PMQ，因為小小豬有個小任務，就係去跟 Andy哥哥學整RICE BURGER & RICE PUDDING，小小豬嘅大作都唔錯呀
其實我地今日依個任務係PMQ嚟緊「夏日微旅程 - 童行同感」入面其中一個環節 - 米飯班「煮」內嘅活動。小小豬要跟Andy哥哥學整RICE BURGER & RICE PUDDING，其實初時小小豬都問....米飯係一碗碗咁，點可以做食物呀？仲要做布甸，點可以呀？
哈哈哈...我想好多小朋友都係依個想法，所以PMQ就舉辦依個活動。等小朋友對我地平日最熟悉嘅食糧可以有更加了解，一齊聽聽米嘅來源、形態、配搭。同時又可以將米轉化成新奇小吃，原來米都可以用嚟做甜品呀！
我地今日主要目的地就係PMQ味道圖書館，圖書館都可以煮嘢食？係呀...因為依個係味道圖書館嘛
聽負責人ANDY哥哥介紹，原來入面真係有好多唔同種類嘅圖書，總之同飲食有關嘅，都可以係入面搵到呀
好啦...參觀完畢小小豬就開始變身小廚師，煮食前當然係要洗洗手先啦
ANDY哥哥一早為小小豬預備好食物，可以開始煮啦！
先嚟煎個漢堡扒先，有ANDY耐心咁教，依隻豬仔又好似做得幾好，仲煎得唔錯哦(當然係ANDY哥哥嘅功勞啦)
之後就整個米飽面，ANDY哥哥預先整好左一盆米飯，小小豬就係用個模型印個米飽面出嚟~
然後就可以拎去煎啦~ 香口啲就可以加少少黑芝麻一齊煎~
最後炒香小磨菇！就可以好似層層叠咁將食物放好，最後加埋沙律醬~
小小豬牌嘅RICE BURGER完成啦，都算唔錯啦
接住我地就整RICE PUDDING，其實一聽到係整PUDDING我都以為係凍食，原來佢嘅做法係同意大利飯係差唔多，只係將雞湯變成啲甜飲，又好似幾得意。
由於時間關係，前半段煲米飯一早已經準備好了
小小豬就負責將好立克粉加入去，其實唔用好立克都可以，只係小小豬唔飲得朱古力，所以改用好立克
最後再加啲提子乾及玉桂粉調味
攪拌好晒就可以食啦，小小豬等食等到好古惑咁哦~
完成啦
兩樣完成品都真係唔差，不過都係要ANDY哥哥好耐心咁教佢先得做到呀
其實個味道真係唔錯，又估唔到平日我地食嘅米飯係可以有咁多變化，而且仲係一啲都唔難，真係連小朋友都可以做到呀(小小豬已ORDER左話要我再同佢整個RICE BURGER呀)！
除左米飯班「煮」活動之外，PMQ仲會以米、竹、田野及樹木為主題，帶領大家在社區或自然環境中觀察、感受、思考、味嚐，探索感官無限可能，啟發創意思考。
另外，6月26日下午2-5時會舉行「夏日微旅程」Open House，由主理4段旅程的嚮導為大家帶來免費體驗，PMQ更聯同智樂兒童遊樂協會(Playright)，擺下多個遊樂空間，讓3-11歲小朋友享受玩遊戲的原始樂趣！
有興趣嘅朋友仔可以去官方網址睇詳細資料及報名參加： http://www.pmq.org.hk/event/a-sensory-voyage-2016/
