「人人期望可達到，我的快樂比天高...」這句歌詞只係會出現喺「多啦A夢」嘅世界裡面，究竟要再有幾多個了結自己生命，有關方面才會醒覺？！ 定係繼續覺得未燒到埋身就置身事外。
每一次睇見新聞有學生輕生(這個學年第19宗，包括8宗來自中學生)，請問你第一個感受係乜？「駛唔駛自殺咁傻呀？」「有勇氣死點解冇勇氣生存落去呀？」「有冇諗過其他人感受呀？」其實大家有冇諗過呢個教育制度同社會風氣，已經日趨嚴重！ 跟又死唔跟又死！ (當然唔跟風嘅父母最值得一讚) 但係要家長不隨波逐流，逆流而上唔係一件容易嘅事，所以往往佢哋嘅小朋友就成為犠牲品！
唔駛多講，今日嘅教育制度大家都知有幾大鑊，每日番學放學仲要全日制都用咗佢12個鐘，番嚟又做功課又補課又上興趣班，連瞓覺時間都冇！ 都唔好講玩同埋溝通時間！
可能好多家長會話「我從來冇逼自己小朋友，只係會提供一個學習平台俾佢哋，如果佢哋唔肯學最終都唔會逼佢哋」，又或者話「小朋友唔識辛苦，佢哋當去玩之嘛！」等說話。但係撫心自問，你真係重來冇要求佢哋攞到好成績？ 去比賽嘅時侯真係冇諗過要佢哋贏？ 雖然口裡話「It's nevermind，try your best！」但係比賽或考試前你咪又係要佢哋日日練到隻嘢咁！ 有陣時父母自己都未必知道自己不其然流露了對小朋友的極大期望！
再加上小朋友其實都希望自己的父母欣賞自己，愛錫自己！ 覺得應承父母嘅要求會令佢哋開心因此佢哋嘅欣然接受又係咪真係佢哋心目中所願呢？ 其實小朋友未必可以好似大人咁，好清晰咁表達自己嘅意願，又未能預料生活時間表會有變樣！ 可能佢哋都唔知報多幾樣興趣班係會令自己冇時間睇電視同玩具！
其實以上都只不過係一個假定或者推測佢哋輕生嘅原因，大部份新聞及媒體報導都會話嗰個輕生嘅學生係因為學業壓力而自殺，跟住又訪問番佢學校嘅教師同校長，話佢係品學兼優，平時好乖好靜！ 總之將佢講得好好，等讀者覺得有點可惜，家長們得點安慰！ 我並非話唔係事實，但係唔該唔好幫佢哋假設咁多嘢，重點不在於佢哋點解要輕生，反之係各位父母同佢哋有幾多溝通，用幾多時間去聽佢哋講嘢！
所以唔好再同我講話「嗰D跳樓自殺嘅學生有冇諗過父母感受？知唔知你老豆老母會幾傷心？」我想講佢哋依家諗住去死仲點會去顧及其他人感受，平日累積的壓力，正正來自於太過在意「父母感受」。在生又要顧佢哋感受，臨死前又要顧佢哋感受，不如大家先去關心學生的感受！！！
無論係學業壓力(可能叻嘅小朋友讀得好自在)、父母期望(可能有父母好開通又平衡得好好)，生活唔開心等咩原因都好，聆聽、擁抱同鼓勵真係好重要！ 即使你用咗幾多時間於學業，興趣班及比賽上，請你花一定的時間在呢三方面上！係認真地…「聆聽」、「擁抱」 及「鼓勵」！
