踏入流感高峰期，以前對傷風敏冒可以話零警覺嘅我，雖則到依家對病菌嘅敏感度都係極其咁低，有時候咳到斷氣都懶得睇醫生，但一聽到幼童係流感高危嘅染病人士，嚴重會引起肺炎、腦膜炎，更有機會出現死亡個案，啲阿媽神經就即時好似蜘蛛絲咁爆晒出嚟！
睇到有關幼稚園爆發流感新聞之後，阿媽族擔心症馬上就病發，完全停止唔到無限幻想，即係返學嘅話要戴口罩？你帶人哋唔帶又可以點搞？點樣確保個阿仔會手多多扯低個口罩？聽埋個停課安排就仲驚，即係如果即時停課，邊個接阿仔？又如果學校非強制性停課，我又使唔使自行選擇停課？癲咗咁諗 完之後，先驚覺其實定咩都未使返學......但又之但係，避得一時又點避得一世，流感年年有，今年唔驚，下年都要驚，做人阿媽真係要準備好隨時打仗嘅心情，但其實準備好迎戰，都只係治標唔治本嘅方法。
如果有得揀，梗係想個仔身體健康啦，醫生就話，除咗體弱同早產小朋友容易中招之外，有偏食習慣嘅小朋友都係高危一族，咁睇嚟都係先由根本做起！
