上個星期一家三口去了佐敦一帶，準備跟外母一家飲茶，但又未到時間。
肚有點餓就擔粗粗去了排澳牛，食個光速餐。
我每逢經過個區，都會食澳牛，我也算是一個澳牛老手，絕對能以超光速解決一個澳牛茶餐。
不過排隊時就開始諗，帶住個兩歲豆丁來到澳牛，真係前世未被人鬧過。
在我腦海閃過無數個會被人鬧/串的時刻。
– 呢個細路食唔食野架？唔食野無位坐。
– 細路食到成地都係，就唔好帶出街啦
– 扭計就返屋企
– 座位好迫，好容易攪到其他人，火爆伙記會唔會趕我地走呢？
一路向前步向澳牛的門口，就開始想縮沙，過隔離食碗雲吞面就算。
當前面還有五六個食客之際，安排坐位的那個伙記就逐一問我地有幾多人
“你地幾個？"
“三個，兩大一小"
再打量了我們一眼，就說：
“四個喎，仲有熊仔" (霖霖手抱小熊)
心想，未入去都開始串串貢，入到去咪死，霖媽說而家仲走得啊，
但怎知道那位大哥轉過頭就指著我們說：
“熊仔個個，入黎"
就這樣我們就超過前面幾位食客，像貴賓一樣，優先進場。
“左邊直入，最後個個卡位"
頭先排隊已經有諗過叫佢俾個卡位我地，但係又唔敢講，
而家唔洗講都有，真好彩。
會唔會佢其實想我地一家三口坐埋一邊呢？
過左一陣，又無叫其他人過黎坐，所以我們兩大一小，就佔據著整個四人卡位。
完全覺得，我地係唔係去錯左餐廳，呢度係唔係澳牛。
由於身處最後排的卡位，這個位得天獨厚，沒有人會吹你落單。
第一次係澳牛感覺被冷落了，我們要叫才有伙記過來落單。
叫野食方面我們不敢點一個餐三個人分，
坐係四人廂座，點都要叫多一點掛？
所以我們點了一個餐，一碗燉奶和一杯凍飲。
有個伙記還走過來跟霖霖開玩笑
“呢度唔可以帶動物入黎喎"
對於這次神奇的經歷，不得不記下來。
這也是霖霖的第一次澳牛經歷，她很愛吃這裡的火腿和炒蛋。
原來澳牛也有這樣的一面。
———————————————-
警告：未必人人都咁好彩。
