校園欺凌問題其實一直存在，今年開學突然被搬上檯面講，人人加把口其實唔見得有幾大幫助，因為要減少欺凌，從來都係預防勝於治療。
《叮噹》裏面嘅技安無理由天生就係惡霸，咁點解佢會成日郁D就打人？唔通真係好似某D人咁講係老師造成？一個老師教咁多學生，點解只有技安養成欺凌習慣？同班靜宜同英才同學咁用心聽老師話，又唔見佢地欺負人？未開學就話老師「促成校園欺凌」本身已含欺凌成份，係唯恐天下不亂，但係你咁樣係唔會令到我驚㗎。
技安俾老師鬧兩句罰吓企，下次咪又係搵個捧球一嘢丟落大雄個頭度。想知點解無改善，鏡頭就要pan過去睇吓技安媽媽。技安每次闖禍返到屋企，佢阿媽都係直接中落佢個頭，有時仲會當街當巷打仔。連你去日本睇叮噹展覽，都會見技安係俾阿媽追打緊，你就知暴力同技安呢位小朋友係幾咁接近。
「父母如何，孩子便如何」呢樣嘢係前線教育工作者有好深體會嘅定律。因為體驗過暴力而相信暴力嘅人，先會覺得自己會被暴力加害，然後成日諗住點用暴力保護返自己，惡性循環不息。
成日有人話香港教育幾衰幾衰，但一直以來，學生出到嚟係有一定水平嘅，起碼整體上奉公守法、偏愛和平；畢業後，大部份會成為支撐整個社會發展各個階層一份子，明白世上無不勞而獲。喺一個咁不濟嘅制度下面有咁嘅成果，其中老師扮演嘅角色有一定嘅重要性。
而家唔係自吹自擂或要大家俾掌聲，只係希望老師唔好妄自菲薄，我地一定要繼續相信教育喺亂世嘅份量，先可以企得穩。唔洗怕D茄喱啡對自己專業指指點點，因為我地完全知道自己做緊乜嘢。
為師則強，但教師強而不悍。林肯都話希望自己個仔從老師身上學到 be gentle with gentle people, and tough with the tough，就係咁解。我地知道，比起拳腳同歪理，知識與良知先係支撐社會嘅最強後盾。
所以香港老師一直默默耕耘、以身作則，就算自己唔係好多法寶，都會攞曬出嚟派俾學生，希望佢地袋得幾多得幾多。務求佢地大個之後，口袋裡面有一兩件法寶可以令人人如意開心歡笑，為別人舒憂解困、一點一滴改變世界。
其實老師對下一代嘅期望係超乎想像咁高，豈止希望學生唔做欺凌人嘅技安、或者避免淪為被欺凌嘅大雄？我地係希望佢地能夠成為叮噹、能夠獨當一面做主角啊！
踐踏教師其實等於踐踏未來；甘願一世做茄喱啡嘅人，大概永遠都唔會諗得通。
