星期日，同囝囝囡囡去文娛中心黑盒劇場，睇一套名為《小樹的神奇畫筆》嘅音樂劇。除了迪士尼樂園嘅米奇音樂劇之外，兩兄妹平時極少機會接觸呢類活動。因為妹妹正學跳舞，跳舞老師安排佢睇過《胡桃夾子》; 而哥哥，剛巧學校就在上個學年舉辦了《Wonderland of Oz》。所以佢哋各人都只有一次觀看音樂舞台劇嘅經驗。
不過平時睇音樂劇，都係靜靜坐係度睇，但今次有少少唔同，係互動的。入場前，哥哥妹妹都充滿期待，究竟係點樣互動呢？
先講一下故事簡介，「小樹同一般小朋友一樣，好鍾意畫畫，不過淨係鍾意畫普通嘅大樹，小樹去到蛋糕姐姐嘅畫室，蛋糕姐姐用各種顏色、方法、畫具，同埋介紹名畫，鼓勵小樹多方面創作，突破自己，畫出唔同種類嘅樹。 」
整個音樂劇中，以三位著名畫家嘅作品，介紹唔同嘅畫畫方式，例如梵高嘅向日葵畫；Suerat嘅點彩畫，運用一點一點嘅繪畫方式；Mondrian就運用幾何圖形畫畫。令小朋友知道，畫畫唔係單單用線條，原來仲有其他特別方法去構成一幅美麗嘅圖畫。
劇中嘅演員姐姐，會不斷問問題，希望得到在場小朋友嘅回應，例如問小朋友鍾意畫咩呀？鍾意咩顏色呀？小朋友可以暢所欲言，大大聲回答。另外，仲會派顏色水筆同卡紙比每位小朋友，引導佢哋一齊繪畫。仲有手指小電筒，揮揮小手指，用光來幻想畫畫。令場內瀰漫一片熱鬧笑聲。
劇中除咗唱歌同跳舞之外，仲介紹及演奏咗三種樂器，分別係牧童笛、長笛、非洲其中一款民族笛，令小朋友認識更多之外，我身為媽媽都大開眼界，第一次見到非洲那枝笛，吹出來是鴨鴨叫的聲音，好特別。
呢套音樂劇，係由 Caketime Music 蛋糕劇團演出，佢哋嘅宗旨，係希望透過互動音樂劇，令小朋友多認識藝術及音樂之餘，亦令小朋友得到全面發展，唔再係坐定定去聽書學習，而係勇於表達，用說話表達感想。親身參與活動，令學習更有趣，印象更深。另外，更重要嘅係親子時間，演員會要求家長一齊參與，跟著小朋友一起揮動手指「畫畫」，一起唱歌等。
來緊劇團嘅新節目將會係《孫悟空玩轉中樂團》，以《西遊記》故事改編，配上現場中樂演出。有興趣嘅各位，可以上網搜尋資料。
音樂
