嘩哈哈！小小豬發生咩事，做乜咁緊張呀！？
哈哈哈，之唔係同鱷魚先生玩緊遊戲囉！
早喺幾個月前我哋都覺得小小豬好似有選擇恐懼，每一次畀多個一個選擇時，佢都一定做唔到，有時仲會忟憎起上嚟。為咗訓練佢呢一方面，大肥豬爸爸就買咗呢個按鱷魚牙齒玩具，等佢可以練習選擇之餘，仲練吓佢個膽(因為鱷魚先生合咀時又真係幾得人驚)。
不過，當時小小豬一直都唔肯玩，無論我地點氹點教同鼓勵，小小豬始終都唔肯。為咗唔想嚇親小小豬，所以我地都暫停咗呢個計劃，等適當時間再拎出嚟訓練再玩過。
說時遲，那時快，估唔到隔咗一個月之後，鱷魚先生就重見天日喇！
事緣今期學校教嘅主題係「誰來幫助我們」，咁大肥豬就借機叫小小豬扮牙醫，叫佢幫鱷魚先生檢查牙齒。由於之前小小豬一見到鱷魚先生就會即刻say no，所以開頭估小小豬會唔肯玩。
唔知係唔係小小豬知道自己係牙醫，所以完全唔驚，仲非常落力咁同鱷魚先生檢查牙齒呀！
先嚟同鱷魚先生情深對望吓先。
開始擦牙啦！
之後按吓鱷魚先生牙仔，睇吓邊隻唔舒服先。
哈哈，搵到啦！等我餵鱷魚先生食藥。
今日小小豬真係令我地好驚喜，完全唔再驚鱷魚先生，仲肯按啲牙仔，就算鱷魚先生合埋咀巴佢都唔驚，仲成日講話佢係醫生，真係好搞笑呀！
不過，今次小小豬有呢個表現，真係要俾個叻叻大肥豬爸爸，可以引用學校教緊嘅話題，引小小豬去玩呢個小遊戲，等佢可以克服鱷魚先生。
大肥豬成日都會諗好多唔同方法引導小小豬，所以大肥豬真係一個好爸爸嚟呀！
