做事向來出人意表嘅才子林作最近被爆與曾經失婚嘅裕美譜出戀曲，明明拍拖係兩個人嘅事，偏偏就弄出滿城風雨，就連神秘作家葉朗程都加把口，形容「林美戀」係竹門對膠門，掀起連場網上舌戰。
大眾咁大反應，除咗係因爲裕美曾經有一段破碎嘅婚姻，同時林作嘅前女友正正係十優港姐麥明詩，無論出身同亮麗嘅學歷，通通被拿作比較；不過講來講來呢啲都係外人意見，重要與否都係睇你點諗，之但係若然連屋企人都明言反對，咁又應唔應該繼續，又或者如何拆解呢？
討論區熱話：睇得出林作媽媽真係好無奈
講到呢個問題，或者就真係要靠林作親身示範點樣先可以收拾殘局！對於成長於單親家庭嘅林作，林媽媽無疑係佢人生相當重要嘅人，偏偏林媽媽就似乎對呢位「未來新抱」唔多滿意，仲話如果個仔奉子成婚的話，將會狠下心腸斷絕母子關係，呢場預告式嘅「婆媳糾紛」戲碼，到底又應該點收科？
有網民就話做阿媽嘅又點可以以母子關係支配個仔，唔識放手對大家都無好處，但亦有人理解林媽媽處境，咁辛苦培養佢成材，都希望佢有「更好」嘅選擇，唔高興都係人之常情，一早講定唔鍾意，總好過將來扮友好。
討論區熱話：睇得出林作媽媽真係好無奈
其實作為父母，喺仔女選擇配偶嘅時候，反應過激或者諸多阻撓，都未必係一件好事，若然真係要加以意見，似乎都係向理性討論比較實際；仔女成長之後，自然有自己世界，而講到挑選伴侶，終歸要對一世嘅都係佢，佢哋心靈上嘅交流同溝通，或者真係只有佢兩口子先可以心領神會，所以喺畀意見嘅後面，最重要都係尊重佢嘅決定。
愛情本身就無錯對嘅，而每種關係嘅開端都源於彼此，就連婆媳關係都唔例外，當然每個人都有自己嘅喜惡，用自己方式去表達出嚟亦不為過，之但係強於將自己把尺放喺別人身上，就似乎唔太適合，更甚嘅係，要對方為自己喜惡表達上，展現出自己期望嘅回應就更加係強人所求，好似話其實有唔少奶奶都鍾意裝出一副大好人嘅模樣，到新抱嘅回應達唔到佢想要嘅時候，就會變成無禮貌、無家教；又或者新抱們成日都會抱住一句「我嫁你個仔，又唔係嫁你。」
經常以高姿態示人，又成日覺得奶奶不合時宜，慣性拒絕，都隨時令關係出現裂痕，其實將心比心，調返轉將來自己做奶奶，又會唔會希望受到咁嘅對待？呢啲惡性循環，其實都好值得令人反思，婆媳糾紛到底係「命中註定」還是「傭人自擾」，就真係要睇你造化喇！
