人生去到40幾歲，仔大女大，有返咁上下積蓄，得閒兩公婆去遊山玩水好寫意呢！吓！意外有咗BB？高齡媽媽生仔風險特別高，要再經歷過懷孕痛苦、棉乾睡濕嘅湊仔生活，仲要考慮經濟同教育問題，高齡媽媽唔易做！討論區有好多唔同意見，Click入睇睇有咩可參考先！
1. 財政問題
生BB開支好大，淨係入公醫院定私家醫院生，差價都好大。奶粉尿片、供書教學全部都係開支。依家流行要贏在起跑線，雖然唔想催谷小朋友，但就算唔特別爭先起跑，都總唔夠人地跑咗，自己繼續原地踏步吧！報三四個運動、外語興趣班唔少得，仲要諗諗入唔入直資學校，生得BB出嚟，梗係想畀佢最優質嘅資源啦！
不過，40幾歲，距離退休只有大概20年，香港人人均壽命有80幾歲，即係20年內，又要養小朋友，又要日常開支、又要儲錢準備足夠20年嘅退休生活花費……高齡媽媽條數真係好難計！
2. 體格要求
人到中年，手腳關節痛、三高等健康問題總會中幾樣，仲要陀幾十磅嘅BB喺個肚度？淨係諗下，都覺得腰骨赤赤痛！BB出世之後隨時瞓都無得瞓，廿年前都仲頂得順。依家？瞓少兩個鐘都唔夠精神！或者可以請陪月/外傭姐姐幫手湊？半夜餵奶唔通叫醒個外傭做咩？BB大咗要學踩單車，淨係幫佢推單車都氣咳腰痛，點算？生仔嘅體格要求對高齡媽媽嚟講真係好高呢！
3. 夫妻關係
本來仔女都大個晒，過咗「無仔一身輕」嘅日子好多年，突然間要切換返去「爸爸模式」？老公好可能接受唔到要重新湊BB，仲要追貼現今世代嘅教育模式：上playgroup、揀學校、撲學位，加上年紀大，容易攰，容易因為育兒哺乳大小事嘈交，影響夫妻感情。
4. 對已長大的小朋友影響
如果高齡媽媽本身已經有十幾甚至二十歲嘅仔女，佢點樣適應突然間多個細佬妹？見到爸爸媽媽湊細佬妹湊得辛苦，幫手湊埋一份，會唔會影響到大仔/女嘅私人生活？幫手湊BB似乎會令大仔/女多咗份額外嘅責任。如果大仔/女係獨生嘅話，多年來習慣萬千寵愛，會唔會覺得被細佬妹爭寵而妒忌？
高齡媽媽特別多嘢要考慮，真係唔易安排啊！
