當我知道自己有咗二寶之後，我即刻睇返屋企平日用開嘅護膚品，到底係咪適合懷孕期間使用。
因為當女性陀咗BB之後，體內嘅激素就會產生變化，皮膚容易變得乾燥、暗黃、仲容易出現敏感等問題。同時間亦唔可以化濃妝，(好彩我本身鍾意自然妝容，近乎素顏)。但就算唔化濃妝、唔化妝日常嘅護膚都係好重要嘅。
如果孕婦用咗含有化學成分、重金屬等有害物質嘅化妝品或者護膚品，係會影響BB正常發育。
因為BB係透過胎盤從母體獲取營養，而化妝品、護膚品上嘅微細分子物質都能夠通過胎盤進入胎兒體內。如果成分係有害，就會影響BB嘅發育o架啦！
所以孕婦要選化妝品、護膚品嘅話，都係要選擇返純天然成分。
孕婦選擇護膚品，最好選擇無添加酒精、染料、礦物油、激素、重金屬、凡士林、丙二醇、異丙醇、石蠟等。而重點要留意，產品一定唔可以含有以下成分；
1、維A類成分
2、水楊酸 Salicylic acid (通常用於祛痘類嘅護膚品中)
3、過氧化苯甲醯 Benzoyl peroxide (通常用於祛痘類嘅護膚品中)
4、AHA (即果酸，通常用於去角質嘅護膚品)
另外，陀B期間都唔適宜用具有美白、祛痘、祛斑功效嘅護膚品了。
所以，孕媽媽要留意清楚護膚品成分先使用呀~唔好聽人講話好用就馬上使用呀。
