相信有好多孕婦都曾經有呢個疑問，到底懷孕期間應唔應該去拜山？ 又或者懷孕幾多週先可以去拜山？對於以上嘅疑問，Juicy媽就覺得問題本身已經係有問題，由於每個人喺懷孕期間嘅生理狀況都唔同，所以唔係應唔應該，而係應唔應付到嘅問題，再者呢個問題亦應該只有孕婦本身先可以解答。
至於講到去或者唔好去嘅原因，其實就要從多角度分析；
首先係拜山環境，憑以往經歷你大概可以知道環境會唔會好焗促，因為始終有人會選擇燃燒冥鏹，造成濃煙，喺對氣味相當敏感嘅懷孕期間，可能會令你感到不適，而如果空氣夠流通，又或者係上山掃墓嘅你，其實只要遠離少少燃燒大型祭品嘅地方就ok啦！
第二係考慮到腳程問題，以一般嚟講，拜山路程通常唔係樓梯多，就要行山路，仲要加埋封路情況？就算身懷六甲要做下運動，都真係有啲吃力啦，都唔好講「清明時節雨紛紛」啦！所以就算身體狀況OK，或者都可以揀唔封路嘅日子先去！
最後，以迷信角度嚟講，有人會覺得墓地陰氣較重，會對BB帶來唔好嘅影響，其實鬼神之說，Juicy媽就認為要睇返自己信仰，都有人會話醫院陰氣重啦，咁唔通唔去產檢咩，所以最緊要都係心安理得，覺得舒服咪去囉。
咁孕婦點解要考慮咁多因素，而決定拜唔拜山？有啲人係因為夫家壓力，有啲就係基於自己好尊敬長輩，不過無論係因為咩原因都好，老土啲咁講，去與唔去，最重要梗係衡量自己當時體格，唔使煞有戒事咁拒絕出席，亦唔需要夾硬嚟；始終拜山啫，唔使搵命博，學各位JM教路：「問吓自己屋企長老睇法」或者「視乎自己身體狀況」，其實「最緊要講心意」，今年唔去，咪生完先去囉，等BB大啲帶埋佢去探先人，都係個好選擇呀！
