大家都知餵母乳對BB同埋對媽咪都好,但係有幾好?除咗成日都話可以製造抗體,增強BB免疫力,其實仲有好多其他好處。
最近英國有項研究,追蹤五千名大約18歲有肥胖基因的青少年,發現如果嬰孩時期有持續全母乳餵哺達五個月,對日後預防超重和肥胖有關鍵作用。當中後生女比後生仔更加明顯。
但是,如果嬰孩時期只有三個月或以下的母乳餵哺,這樣的幫助就不明顯。
對於嗰啲食少少都肥,或者減極都好難瘦嘅朋友,不妨問吓媽咪,當年有冇食母乳超過五個月以上。
同樣地,唔想第時個囝囝同囡囡成日都要為咗減肥而苦惱,媽咪再努力啲,堅持餵母乳啦。
母乳媽媽唔易做,每一日都有好多時刻想放棄,又眼瞓,又麻煩,但係如果經常都諗多啲母乳對BB同媽咪嘅益處,就係堅持嘅最有效方法。
母乳媽媽加油!
Ref: Genetics, 2020; 16 (6): e1008790