有傳范冰冰每日至少敷2塊面膜以達致美白效果，有時甚至更多！喺坐車、食飯、睡覺時，都爭取時間敷面膜，想有女明星咁好嘅皮膚，有唔少人都學冰冰咁日日敷面膜，幫肌膚補濕美白，但咁敷法又係唔係真係好呢？
其實點敷面膜好睇個人膚質，美白面膜裏面有啲成份，例如：麴酸同葡萄糖苷，都有可能刺激皮膚，尤其是敏感性肌膚。曾經有女士求診，就係因為貪靚喺大日子之前勤力敷面膜，搞到皮膚過敏，成面又紅又腫。對油性肌膚人士嚟講，每日敷面膜有機會造成毛孔阻塞，仲容易出暗瘡，得不償失。
其實敷面膜係為皮膚進行急救嘅一個方法，當敷得太密集，就會令皮膚習慣咗，長遠會失去修復能力，更加會令皮膚變得脆弱敏感。有時想皮膚保持水潤，除咗早晚保養之外，中午時分可以用花水補濕，再搽多層精華同面霜。
至於靠面膜美白，始終敷面膜都只係治療已有色斑同暗黃，不如加強防曬，預防色素產生，而且面膜對深層色斑效果有限，敷得再密集都無咩用，好多時都需要用到激光先可以消除。
而面膜包裝袋都會有建議的使用頻率，例如：建議每星期用1至2次既，咁就唔應該日日用啦。
所以想好似明星咁白滑，都要視乎膚質，唔好盲目跟隨呀。
