成日話貪靚係女人嘅天性，各大化妝品牌推出咁多新產品，加上幾個月一次嘅優惠日，都會忍唔買啲化妝品，但係得一塊面又點會用得哂，所以好多時都會有成堆化妝品喺屋企，有啲重見天日時都已經過咗期。
最近有英國嘅大學進行研究，針對消費者提供嘅化妝品進行檢測，發現 90% 以上都帶有有害細菌，其中仲包括大腸桿菌同金黃葡萄球菌，而呢啲細菌都係可以對健康造成影響，尤其是如果呢啲含有有害細菌嘅化妝品用喺眼睛同嘴等部位，更容易令人生病，對免疫力較低嘅人嚟講就更加高危！
其實化妝品都有保質期，一般未開封嘅化妝品都可以保存3年，但要留意開封使用後，就只有幾個月嘅保質期，而保質期嘅長短就係根據商品特性，例如：睫毛膏容易滋生細菌，一般嚟講都唔好用超過3個月；而粉裝嘅產品，例如：碎粉，因為當中無水份，所以都無咁易滋生細菌，保質期都會相當長少少，可以放耐啲，一般大概6個月左右。
更多文章：【護膚診症室】扮靚心慌慌！化妝品致癌？Paraben 成份你要知
當然，可以放幾耐都係講緊一般情況，大家都應該留意產品有無變質，例如：已開封產品有無變味，或者出現油水分離嘅狀態；如果有嘅話，就算產品未到建議保存期限，都唔應該再使用！
圖片來源：eriko_s2@instagram
