懷孕早期時有機會孕吐，胃口自然差啲，而隨住懷孕週數越大，個肚都越大，頂住個胃，所以我哋應該要少食多餐。
深海魚容易有重金屬，特別係體型大嘅魚，例如：呑拿魚，更會含有水銀，對BB腦部發育會有影響，但魚又同時有對腦部發展有益嘅DHA，所以懷孕時，要取個平衡，每星期食2次魚類就夠。
肉類方面，市面上好多雞同豬肉都有標明不含激素，但咁係唔夠咖，我哋要選擇不含抗生素嘅肉。有機食品賣得好貴，所以我通常選擇價錢相宜，但質量又有保證嘅丹麥豬同泰國雞。
為預防懷孕期間有糖尿病、高血壓同腳腫，我嘅煮食方法都係以蒸同炆為主，謝絕煎炸食物，調味亦係少糖少鹽，盡量以天然調味料，例如：薑、蒜、香草、青檸。
以下係我嘅餐單分享：
餐單1
早餐: 熱牛奶1杯，芝麻粉一匙，蛋1隻，水果3種，穀物半碗
午餐: 三文魚1件，1碗菠菜，1小碗藜麥糙米飯
下午茶：蘋果1隻
晚餐：冬菇蒸肉餅，1碗菜心、1碗糙米混紅米飯
宵夜：合桃5粒，豆漿1杯
餐單2
早餐: 熱牛奶1杯，芝麻粉一匙，蛋1隻，蕃薯1碗，奇異果1個
午餐: 蕃茄牛肉片，1小碗藜麥糙米飯，1碗莧菜
下午茶: 全麥餅乾2片，熱牛奶1杯
晚餐: 蒸雞，毛瓜1碗，1碗糙米混紅米飯
宵夜: 紅石榴1個
