想飲湯但又唔知煲咩好，最好不過就係去相熟藥材店偷師，今次店主就介紹左依個太子蔘淮山瘦肉湯俾我，佢話可以健脾開胃、潤肺理氣、生津止渴，好啱依家天氣飲。咁當然我都好乖乖咁買一份材料，就煲俾兩位老細飲啦！
太子蔘治氣虛肺燥，補脾土，消水腫，化痰止渴；淮山健脾補肺益腎；麥冬養陰潤肺、益胃生津、清心除煩；沙蔘養陰清肺，益胃生津；海玉竹清熱、養陰、生津、潤燥、潤肺作用；湘蓮補脾止瀉、益腎固精、養心安神；養陰潤肺止咳，清心安神。(網上資料)
麥冬10g、太子蔘12g、湘蓮30g、淮山30g、沙蔘14g、海竹20g、百合25g、蜜棗3粒及瘦肉$30~
將所有藥材就浸洗一陣~
瘦肉洗淨汆水備用~
煲內放約3L水，然後隨水加入所有材料~
待再次滾起時，用大火加蓋煲約15分鐘~
再轉慢火加蓋煲1.5小時~
最後加入少少鹽調味，就可以飲啦~
一聽見個"蔘"字可能都會擔心佢嗰個味，但其實煲起時係會聞到好大陣太子蔘味，但入口就唔會好覺有味。雖然整個湯都係以藥材為主，不過飲落又唔會好重藥材味，都唔錯呀！
溫馨提示：
由於個別人仕體質不同，所以大家記得煲之前了解下自己，如有疑問，請先向註冊中醫查詢！
