小JM越大，食嘅野就越來越講究，人仔細細就已經會揀自己鐘意嘅野來食，有時俾佢食嘅餅唔好食、唔啱食嘅話，小JM食食下就會唔食，有時仲會曳到將唔食嘅野掉落地。
通常爸爸見到都會鬧，我都會。因為任何玩食物同掉食物都係唔啱，要慢慢開始教識小JM唔好浪費先得啦！
今日媽媽我真係得閒無事無野做，無啦啦去超市買野個陣見到啲蛋糕粉，所以就同爸爸講不如整蛋糕俾小JM食。
買蛋糕粉個陣仲俾小JM自己揀整咩蛋糕添，不過小JM咪又係睇包裝而揀！哈哈！結果小JM係揀左斑蘭蛋糕。
用蛋糕粉係方便，但有一樣野唔好就係糖嘅分量無得預！所以有機會都想自己整再低糖啲嘅。
材料：
斑蘭蛋糕粉…… 一盒
雞蛋…………… 三隻
無鹽牛油……… 1/3盒
工具：
六吋蛋糕模…… 一套
電動打蛋器…… 一套
湯匙…………… 一隻
刮刀（如有）… 一把
碗……………… 數隻
做法：
1. 預先將焗爐預熱至180度。
2. 將雞蛋打勻至起泡以備用（約2分鐘左右就夠架啦）。
3. 將斑蘭蛋糕粉加入蛋液中，再以攪拌器打勻，變成糊狀即可（約7分鐘左右啦）。
4. 加入已經攤好嘅室溫牛油。
5. 加咗牛油就轉用刮刀、湯匙或者用木棒攪勻。
6. 完全攪勻之後就可以係預先準備好嘅蛋糕模搽上牛油，咁就無咁易痴實晒甩唔到模。
7. 最後就係將蛋糕漿倒入模再放入焗爐。
8. 以180度焗35-40分鐘就可以。
小技巧：
想知蛋糕到底焗好未？其實用小竹籤插入蛋糕就得，只要竹籤無黏住蛋糕糊就即係okay架啦。
終於出爐啦！嗯。個頂有少少好似over咗添！
好彩都唔影響味道，中間都好soft架。
我地仲帶咗啲出去俾朋友仔一齊食添。好好彩小JM都肯食，唔會話好似出面買嘅麵包同蛋糕咁食少少就掉。
