依排天氣都真係勁乾燥，當然要密密煲涼茶打好底先得。秋天就一定係煲多啲無花果茶飲，平日就多用雪梨煲，不過今次攪攪新意思，用紫無花果加配紅蘿蔔嚟煲，咁就可以滋潤健脾，啱晒小小豬飲啦！
紫花果係無花果一種，質感較軟，含豐富花青素同埋抗氧化，所以對眼睛同埋皮膚都有幫助。而且仲可以防治傷風、感冒，增強體質；紅蘿蔔可健脾寬中及治咳嗽；百合可清火、潤肺及安神。(網上資料)
紫無花果8粒、紅蘿蔔2條、乾百合1湯匙、南北杏1湯匙~
紅蘿蔔洗淨去皮切件~
其他材料浸洗一陣~
將所有材料及1.5L水加入煲內~
然後用大火加蓋煲約10分鐘~
繼續用慢火加蓋煲多30分鐘~
最後熄火焗多15分鐘之後就可以飲得啦~
當小小豬飲嘅時候，佢竟然識得講：MaMi...依個新涼茶又幾好飲，少少甜...清清地都唔錯呀！(幾時變左食評家，咁老積嘅...哈哈哈)
溫馨提示：
– 由於個別人仕體質不同，所以大家記得煲之前了解下自己，如有疑問，請先向註冊中醫查詢！
