放復活節假期就真係日日節目精彩，亦都因為咁我就懶懶地都冇乜正正式式咁煮過飯。回歸平淡之後就當然又要勤力返少少，又係時候煲啖靚湯俾兩位老細滋潤下。
去藥材店入貨嘅時候，店主叔叔就教我煲依個沙參玉竹淮山海底椰瘦肉湯，佢話可以潤肺止咳之外，仲可以降血壓、降膽固醇、健脾益胃同埋補脾益腎。
講到咁好就當然即刻執返一份湯料回家努力扮下賢妻良母啦~
沙參有助養陰清肺及益胃生津；玉竹則能養陰潤燥，生津止渴；淮山補脾、養肺、脾虛洩瀉、食少浮腫；海底椰有助清燥熱、止咳、滋陰補腎；陳皮主治脾胃氣滯、脘腹脹滿或疼痛、消化不良；南北杏可止咳下氣，潤燥消積；無花果潤肺止咳、清熱潤腸。(網上資料)
沙參一両、玉竹一両、淮山一両、海底椰一両、陳皮一角、無花果三粒、南北杏一湯匙、瘦肉約$30~
將所有材料浸洗一陣~
陳皮浸至軟身，然後刮囊~
瘦肉洗淨汆水~
煲內放約2.5L水，然後隨水加入陳皮~
待滾起後，加入所有材料~
繼續用大火加蓋煲約30分鐘~
之後轉慢火加蓋煲多2小時~
最後加鹽調味，就可以飲得啦~
雖然係以藥材為主，但啖湯一啲藥味都冇仲甜甜地，所以三口子每人飲幾碗，話咁快就KO成煲湯啦！
溫馨提示：
- 由於涉及藥材成份，個別人仕體質會有所不同，所以大家記得煲之前了解下自己，如有疑問，請先向註冊中醫查詢！
