冬季啲士多啤梨特別靚，見咁靚唔小心買多咗添！既然係咁，不如搵啲嘢整下啦！上個月，朋友去農場玩完，整咗樽果醬番嚟同我哋分享。搞到我都心思思想同晴朗試下整果醬添！心動不如行動，馬上開始囉！
材料：
士多啤梨 500g
檸檬 1個
砂糖 200g
做法：
1. 士多啤梨用清水浸約15分鐘
2. 去除士多啤梨蒂
用飲管插落士多啤梨底部直穿至頂，快捷又方便~ 話咁快就搞掂！Yeah!!!
全部都係晴朗嘅傑作，小朋友都做得到，你話幾咁容易呢？
3. 加兩小羮鹽落水，將士多啤梨放入鹽水中，浸約5分鐘。
4. 趁呢個時候，洗乾淨啲玻璃樽，然後放晒落煲度，預備消毒。
5. 用滾水煮約5分鐘。
6. 用食物夾逐個玻璃樽夾出，倒轉風乾，備用。
7. 士多啤梨沖洗乾淨，切粒，隔篩去除水份
8. 量好200g糖，備用。
9. 將士多啤梨同埋砂糖梅花間竹一層一層咁疊上去，先落士多啤梨然後糖，再落士多啤梨，如此類推。
士多啤梨釋出嘅水份會慢慢令糖溶化，放入雪櫃待兩小時後取出。
10. 榨檸檬汁。
11. 隔篩倒出檸檬汁，放入雪櫃備用。
12. 兩小時後從雪櫃取出士多啤梨，水份比兩小時前多好多。
13. 將士多啤梨連埋所有糖+水倒晒落煲內。
14. 加入檸檬汁。
15. 中大火滾起後轉至細火，不停輕輕攪伴避免煮燶。
16. 煮至35分鐘，液體開始變成濃稠狀。
45分鐘已經成形！
17. 將士多啤梨果醬入樽。
28. 待放涼後，扭上樽蓋，存放於雪櫃。完成！
煮好嘅士多啤梨果醬已經見唔到果肉，完全溶化晒落果醬度，精華呀！
果醬新鮮製成，梗係要馬上試味啦！賣相不錯，事不延遲~
好唔好味，真係扼唔到人，睇下佢哋嘅食相就知喇！原來新鮮煮起嘅果醬暖暖哋係咁好味㗎！晴朗食完仲要食埋屬於我嘅半份添！雖然我得番半份，但見佢哋食得咁開心，我都好滿足呀！
食譜採用來自韓國嘅士多啤梨，我鍾意佢細粒啲，大小同本地農場摘到嘅相似。揀邊款可按番個人喜好，最直接就梗係邊款靚啲揀邊款啦！煮果醬期間，陣陣撲鼻嘅士多啤梨味真係好香呀！一般煮30-45分鐘果醬便成形。材料新鮮，果醬都特別鮮甜呀！唔鍾意食咁甜嘅朋友，可以落少啲糖，但防腐期就會相對減低。如果落水果重量嘅一半糖，可保存3星期。食譜已略減糖至200g，甜味啱啱好，唔會太甜，亦唔會淡。好味又好玩，仲要無添加，食得開心又健康。大家都同小朋友一齊DIY，共享親子時光啦！
(食譜參照：甜琛廚房)
