依排小小豬好似廚神上身咁，成日都要話同我整蛋糕甜品，見佢咁有興趣都係一件好事，所以就聽佢話，買齊材料整紅莓鬆餅啦
其實依個甜品飲都係我啲天書度搵，仲指定要整依個紅莓鬆餅 ，係未開始動工之前，佢都好專心咁睇晒整個步驟，話要教我點做哦
材料包括有：中筋麵粉、泡打粉、糖、鹽 ¾茶匙、牛油、淡奶、雞蛋、紅莓乾 及雲尼拿香油
首先將 1 ½杯中筋麵粉篩好備用(註：由於食譜冇指明係用咩杯，所以我就用普通量杯，好在都冇出錯....哈哈哈)
將100g牛油座熱變成牛油溶
已溶嘅牛油加入90g淡奶、 1茶匙雲尼拿香油、及蛋兩隻攪勻
再將麵粉逐少逐少慢慢加入奶中攪勻，一定要慢慢加，如果唔係就會起麵粉粒粒，之後有機會焗唔熟蛋糕之餘，仲會食落有粒粒呀
加入½杯糖、1 ½茶匙泡打粉及¾茶匙鹽
最後加入埋紅莓乾(份量就因應個人味啦)，慢慢拌勻至麵糊
將麵糊倒入蛋糕模內
將鬆餅放入已預熱180-190℃的光波爐焗25分鐘
有隻心急嘅為食豬唔肯離開，仲話要企定定睇住啲紅莓鬆餅熟喲
不過，又唔怪得小小豬，因為個紅莓鬆餅又真係幾鬆軟，都叫做拍得住街買嘅咁好味呀
其實同小小豬整嘢食都幾開心，除左見佢整嘅過程好專心似層層之外，見佢食住個製成品嗰個開心滿足樣，都令我開心埋一份呀(當然...諗起後要事後清洗整嘢食工具時.....又真係有點頭痕)
所以....我都係唔好咁懶惰，多啲同小小豬整多啲嘢食，等佢開心滿足一下佢嘅肚仔同心情啦！
