行過生果店見到啲好特別嘅生果，所以就買咗一盒返屋企俾為食嘅小小豬食啦！
依啲咪就係奇異果BB啦！三十蚊一盒，一盒二十粒都無，雖然好似唔多抵，不過我都係第一次見(可能係我大鄉里)，又覺得好得意，所以都買咗一盒啦！
同平時食開嘅奇異果相比，又真係好BB呀！但其實你問我，如果只係睇個外表，真係估唔到佢係奇異果，因為無咗奇異果啲特式－就係啲毛毛啦！
切開一半就知道係奇異果嚟啦！依啲BB除咗頂頭嗰粒蒂之外，基本上全粒都可以食。
第一次食嘅小小豬好似充滿疑問咁哦~
經我解釋同示範之後，睇吓佢食得幾滋味~
我自己就覺得都唔錯，粒粒都好甜，不過唔知係唔係我依盒太熟，所以入口就有好淋嘅口感，依度就扣左啲啲分啦！
亦都係因為依個淋嘅口感，小小豬食咗碗仔入面嗰幾粒之後就話唔食，仲同我講啲大Kiwi好食啲哦！(佢當時個樣真係好認真，真係俾佢笑C呀！)
