叫得糖水，甜就梗啦！但邊款最甜你又知唔知？
消委會聯同食物安全中心測試100個來自各區糖水店、酒樓及荳品店的中式糖水，發現逾半樣本的糖含量，食一碗，相當於每日最高可攝入量的五成或以上。
不要以為生果甜品較健康，眾多樣本中，最高糖份的是楊枝甘露！
楊枝甘露用柚子和芒果做主打食材，雖然芒果本身已含果糖，但仍需要額外糖來平衡柚子的酸澀味，所以糖份比其他糖水多。
其次是番薯糖水，番薯煮得耐已屬高升糖指數 (高GI) 食物，再加上額外的糖水，一豌300克就有30克糖。
相對，腐竹雞蛋和豆腐花是比較健康選擇，特別是豆腐花，未加糖時根本就是豆腐嘛，多少糖自己話事。或者可以兩溝，豆腐花配芝麻糊，都是較健怡的選擇。
總結：
最高糖：楊枝甘露
次高糖：番薯糖水
健康之選：腐竹雞蛋糖水、豆腐花
天氣轉乾燥，與其出街買碗甜到漏的糖水，不如自家製少少甜的腐竹雞蛋糖水，又快又簡單 (起碼易過整豆腐花) ，一大鍋一家人分享，咁先係最sweet嘅食法！
圖片及資料來源：消委會 《選擇》月刊 480 期
