近期網上大熱當然係整LEGO 橡皮糖，見到咁得意我當然好想整埋一份啦，見有網站分享左個中文版食譜，緊係即刻動手整整佢啦！哈哈哈...我啲LEGO人仔橡皮糖靚嗎？
當我睇到個食譜時，發現原來屋企都齊晒所有材料，就連個LEGO人仔模都有(哈哈哈...其實係好耐之前係網上買，買左咁耐都未用，終於都可以開模啦)，所以點可以忍手唔整呢？
準備一個量杯，倒入125ml凍水。
然後倒入62g粟膠。
不停攪拌水及糖漿，直至看見兩者完全混合。
將糖水倒入煲中，但先不要開火，加入14g魚膠粉。
再倒入啫喱粉後等待約1分鐘，讓啫喱粉自行吸收水份。
然後再用匙羹慢慢攪拌至完全混合。
開中低火，煮8分鐘，緊記每隔1至2分鐘要慢慢攪拌，以免糖漿會煮焦。
關火後，待糖漿降至室溫。
然後就可以把糖漿倒至LEGO模中。由於LEGO模都算細粒，所以我用左一個方法，就係用小小豬啲食藥針(放心...依支係新呀)，慢慢吱入去。真係要慢慢呀，因為一快就會吱到啲小泡泡，咁橡皮糖就唔靚啦~
吱好晒就可以放入雪櫃，雪到實就食得啦。
甩模後...我嘅LEGO橡皮糖就誕生啦。
唔係讚自己，啲人仔好靚呀。
仲識排排隊等俾我地食呀。
除左得意之外，又真係幾好食，比起之前用果汁加粟膠嚟整糖糖，明顯係勁煙韌好多，而且又唔會過份膠感呀！
小小豬唔覺唔覺都食左好多粒啦。
哈哈哈...等我搵機會去買埋其他LEGO模，實行等小小豬可以邊食邊砌，相信個感覺一定好正呀！
