我都好鐘意食斑蘭嘅甜品，之前係屋企都自己整過幾款，不過嗰幾次都係用加入斑蘭香精調味。今次買到新鮮嘅斑蘭葉，所以就整左個斑蘭布甸試吓啦。
材料：斑蘭葉5條、糖20g、魚膠片6g、淡忌廉75ml。
先將斑蘭葉洗乾淨，然後剪細。
然後加入熱水150ml焗10分鐘。
魚膠片浸軟備用。
浸了10分鐘的斑蘭葉連水放入攪拌器打碎，然後隔渣成汁。
將斑蘭汁加糖用慢火煮至糖溶。
加入魚膠片攪溶。
放涼後再加入淡忌廉攪勻。
過濾之後，就可以入杯。
依個份量就足夠整三杯仔，我地三口子一人一粒。
放入雪櫃下層雪至凝固。
脫模後就可以食得啦，個賣相都唔錯哦。
口感都好滑呀。
味道又如何？由於係用新鮮斑蘭葉關係，當然係比用斑蘭香精調嘅味來的更加香燶，同埋食落都有一陣草葉味道。
我自己就好鐘意食，不過亦都係因為有嗰一陣草葉味，所以小小豬食兩啖之後就話飽飽唔食，真係唔識欣賞。
我都明白唔係人人都鐘意食嗰一種草葉味，家中只有我一個人識欣賞。不過唔緊要，咁好味嘅甜品我唔介意一個人食晒，只係怕又要肥多兩磅啦...哈哈哈！
