今次我煲咗既滋潤又袪濕，最好就係啱濕疹嘅小小豬飲，呢個就係雪梨薏米水啦！夏天時嘅時候，我間中都有用薏米同檸檬一齊煲，估唔到今次用雪梨嚟煲薏米個味又唔錯啊！
四個雪梨洗淨後切粒去芯！
薏米約小半碗及蜜棗三粒，洗淨後浸約半小時！
煲內放入約3L凍水及加入雪梨！
滾水後放入薏米及蜜棗！
煲滾後轉用小火再煲多三十分鐘！
最後因應個人口味，如有需要可以加入少少冰糖調味。不過我就覺得其實唔呢合份量個味都已經夠甜，加上我又係俾小小豬飲，所以我自己就冇加冰糖呀！
煲好後再焗多二十至三十分鐘！
待涼後就可以過濾入樽，就可以飲用啦！
今次係唔覺意情況下學識咗煲咗呢個雪梨薏米水，估唔到都有驚喜，咁之後可以多煲啲，等兩位老闆可以有多啲唔同選擇呀！
