小小豬廚房又開工，今日我地整左款新甜品，就係利賓納蒟蒻椰果凍！
係FB見有朋友仔整呢個新甜品，見個做法都好簡單，加上之前成日都係整啫喱，都想換吓個口味，所以就買整材料開工啦！
先準備蒟蒻粉38g！
720ml嘅熱水！
將熱水加入蒟蒻粉粉攪均直至溶晒！
要將180ml利賓納加入蒟蒻水內攪均！
朋友嘅食譜係加入啲荔枝肉粒，不過因為小小豬唔鐘意食荔枝，所以我就改加啲椰果。之前見朋友仔買過啲星星椰果覺得好得意，剛好今次超越市場又做特價，所以又買罐嚟整啦！
將啲星星椰果效入杯內！
然後再加入埋利賓納蒟蒻水！
其實我都好鐘意呢兩個步驟，真係可以好好訓練小小豬嘅專注力同手眼協調。因為我會請小小豬放12粒星星椰果落杯內，加上新買杯嘅杯口又比較細，所以真係要好專心咁先可以係唔漏嘅情況下倒滿。
係小小豬都好努力下，倒漏嘅情況都唔算好利害，所以完仍左六杯，可以放入雪櫃啦！
雪左大約四小時，今晚去完街街之後，返到屋企就有好味甜品食啦！
蒟蒻感覺上同啫喱嘅分別唔大，不過食落係有少少唔同，因為蒟蒻口感係比較煙韌啲呀！
小小豬都食得好滋味哦，當然啦...因為佢係一名為食豬嚟嘛！
第一次整蒟蒻果凍，我就覺得個口感同味道都唔錯。大肥豬就覺得都淡左少少，不過俾小小豬食嘅就唔可以咁甜嘛，所以呢個味道就啱啱好啦！
