突然間好想食熱熱地嘅小吃，打開雪櫃睇見有齊晒整材料，所以就同小小豬一齊整滑嘟嘟牛奶蛋嚟食啦！
其實今次整呢個牛奶蛋我都係跟BABY KINGDOM媽媽們食譜嚟整，真係估唔到三樣屋企常有嘅簡單材料，就可以整到咁好味嘅甜品！
首先將一隻雞蛋打好後發勻！
準備一盒屋仔奶！
然後將已打勻嘅雞蛋加入牛奶！
再加入當煉奶，煉奶嘅多少係視乎個人嘅口味，如果鐘意甜啲就可以加多啲。我因為係同小小豬一齊食，唔想食太甜，所以就加左大約兩湯匙左右啦！
之後就慢慢攪拌，攪嘅時候要慢慢，唔好起咁多泡泡呀！
然後就可以慢慢倒入碗啦！
最後加埋個蓋，咁就可以拎去蒸啦！
放入預先煲滾嘅水入面，以中火蒸十分鐘！
好味又滑嘟嘟嘅牛奶蛋就可以食得啦！
睇吓呢隻為食心急豬，熱騰騰都要食呀！
睇佢食得咁開心就知個牛奶蛋有幾好味啦！
我真係好鐘意同小小豬一齊整嘢食，除左係一個好好嘅親子活動之外，係整嘅過程可以訓練一吓小小豬啲指令。完成時見佢食嘢個開心樣，真係令我好有滿足感，所以都要搵多啲唔同食譜，同小小豬多啲親子廚房先得。
