放假活動係留喺屋企親子廚房，今日我地嘅傑作係……豬豬益力多果汁粒！
其實我都真係好少畀糖小小豬食，因為唔想小小豬食得太多糖份食物，食太多對身體或者係牙仔都唔好嘛。不過完全唔畀佢食又唔可以，好似好唔人道咁，所以平日當小小豬乖嘅時候，我都會以獎勵形式畀啲棉花糖或者係司各脫軟糖小小豬食呀！
上星期見到好多朋友仔都整左啲自家製嘅果汁糖，我見都好似幾簡單，加上自家製都應該係健康啲，所以就買齊材料同小小豬嚟個親子廚房啦！
魚膠粉30g。
將益力多1.5支慢慢加入攪勻。
加入少半包糖。其實糖分量可以因應個人口味加減，不過我俾小小豬食就唔落太多，只落少少調吓味。
依個時候就到小小豬出場，佢話要幫手攪勻哦。不過又真係幾幫到手，係好專心咁慢慢攪呀！
之後步驟就需要放入微波爐叮一分鐘，不過因為我無微波爐關係，所以我就用明火隔水蒸一分鐘啦。
最後加埋一茶匙粟膠同一茶匙檸檬汁，不過因為我買唔到檸檬汁，所以今次係無加落去呀。
慢慢攪到變糊狀，就可以倒入模啦！
放入雪櫃雪大約三十分鐘就得啦！
點解攪完啲材料之後會唔見咗小小豬繼續幫手呢？唉……咪因為又係為食所致，佢見到我枱面上仲有半支益力多，所以就用盡佢辨法等我請佢飲(當然係不停讚自己乖、無唔舒服、好開心呀……依啲逗人字句啦)。見佢咁有誠意，就畀佢飲啦！
大家都唔知道，依個為食豬係等啲糖糖雪凍嘅時候，佢係幾咁心急，成日係廚房行嚟行去，又話夠鐘啦、夠鐘啦，嗰半個鐘睇小小豬個為食樣都真係好好笑呀！
等得好辛苦嘅半個鐘已經到啦，小小豬一見我係雪櫃拎啲豬豬出嚟，即刻嚟幫手甩模呀！
仲同啲豬豬排隊添。
哈哈哈，啲豬豬糖真係好得意呀！
見小小豬食得咁開心就知道係好好味啦！
我哋當然有一齊食啦，可能我真係落少咗糖關係，所以又真係淡左啲啲，不過畀小小豬食依個甜度我覺得OK啦！
除咗用益力多之外，都可以用其他果汁嚟整，等我下次用提子汁或者蘋果汁再整畀小小豬食先得！
