由開學到而家，
每日放學去附近嘅公園玩都係指定動作，
而通常都會有一啲同學仔一齊玩。
慢慢觀察就會睇到唔同同學嘅性格同特質。
而最近呢段時間，
間中都會喺你身上見到其他同學仔嘅影子，
可能係一啲説話嘅方法，
或者係表達情緒嘅態度。
驚訝嘅係，
點解可以似得咁緊要！？
而慶幸嘅係，
我有機會陪住你成長，
所以我可以知道其實發生緊咩事。
早喺兩年幾前開始帶你返playgroup，
其實我已經做緊心理準備，
你將會慢慢獨立起嚟，
學嘅嘢唔再只係由我同媽媽去教你，
我要面對嘅衝擊，
一定會越嚟越多、越嚟越大。
只係我冇諗過，
K1都未完成，
朋輩影響嘅威力已經可以咁明顯。
望住你，特別係發緊脾氣嘅時候，
心裡面會講「嘩呢個樣好似XXX呀。。」
同時間亦都終於醒覺，
原來我一早已經進入咗
「要放手畀你行自己嘅路」呢個階段。
之前係頭腦上嘅知道，
而家係從心裡面明白。
一直以嚟我都希望可以把握時間，
喺你開始有自己嘅生活之前，
好好將我認為重要同正確嘅價值觀灌輸畀你，
而我亦都相信，
呢個係幫助你成長接近最重要嘅一環。
行到而家呢一步，
你嘅世界有幾大已經唔再係我可以掌握得到，
我已經唔可以再控制你呢塊海綿吸收啲乜嘢。
灌輸我認為重要同正確嘅價值觀，
無論如何我都會堅持。
只係我知道由而家開始，
我要用更大更多嘅力氣，
用你喜歡嘅方法去畀你感受到，
爸爸好愛好愛你。
