婆媳之間水火不容，而老公很容易就會變成磨心。一名港媽在網上發文大數奶奶的缺點，抱怨奶奶十分霸道，很多事情都要管, 最令她困擾是連何時生小朋友都要給意見，但實情她跟老公早有計劃，希望自己可以先完成Master課程才生小朋友，但面對奶奶的咄咄相逼，人妻快要爆煲「我都好怕有日我會係佢媽面前爆炸」，因此想問一眾網友意見如何改善婆媳關係。
一名人妻在親子王國討論區以「唔洗成日見奶奶但都覺得佢好乞人憎」為題，分享自己跟老公在疫情期間相識，在一起第二年就結婚，結婚前只見過對方的媽媽兩三次，「每次都是大節日之後，再之後試禮服同雙方父母見面。」，可見與奶奶之間並沒有深厚的感情。
以人妻對奶奶的認識，她分享了自己對奶奶的感覺：
//1.人前人後一個樣 係我面前對我友善 係我背後就同佢4位女兒講我唔夠好 叫我老公唔好同我結婚
2.唔識尊重其他人 約佢去試禮服會遲到半個鐘同我阿媽食飯會遲到半個鐘 黎到仲話因為屋企要晾衫所以遲咗
3.重男輕女 我老公係佢獨生子生咗四個家姐先到佢 所以不停逼我老公快啲生男丁 但我們本身已有計劃 等我讀完master
4.自我中心 又命令我唔好養小動物 （本人同老公都鐘意貓)有佢講冇人講唔聽人//
人妻的老公深明婆媳關係很容易水火不容，「我都明白佢手掌係肉手背都係肉」，因此對方都有盡量令她們減少見面。
隨着結婚時間越長，奶奶開始逼兩夫妻生小朋友，但實情人妻跟老公早有計劃，希望自己可以先完成Master課程才生小朋友，但面對奶奶的咄咄相逼令兩夫妻壓力很大，「我老公最近反映佢好大壓力，因為被迫生小朋友，連同佢哋屋企人食飯嘅時間佢哋屋企人都開始講說話俾我聽。」
人妻認為以奶奶霸道的人設令她開始卻步，加上老公很聽奶奶話「有啲擔心生咗出嚟之後，佢會比過多意見我，而我老公又會聽晒佢話。」婆媳之間的關係不太好，直言心底裏不太喜歡奶奶，亦不會想自己的小朋友跟她太多接觸，她生怕奶奶會認為自己搶走了自己的寶貝兒子，「本身對我好似街外人咁唔會關心我，覺得我好似搶咗佢個仔」。
她認為婆媳糾紛某程度上也令她對生小朋友卻步，如果我老公最後是媽媽至上，她絕不能接受「我覺得行唔到落去」。
帖文一出即引來討論，有網民認為如果奶奶打從心底認為人妻搶走兒子，就做什麼事都只是吃力不討好，「講真如果打從佢心底係覺得你搶走佢個仔，你做咩佢都唔會鍾意，所以唔好浪費心機，保持距離就係最好」、「同99同一陣線, 但有幾多新抱做得到, 而又有幾多99欣賞? 好似樓上話齋, 新抱是母子之間的第三者, 勢成水火。」
另外亦有網民勸人妻要三思而後行，認為事主老公也可能會幫自己媽媽，如果自己暫時不想生小朋友就不要被動搖，「佢哋講就容易，又唔係佢哋生。簡單一句 冇人負責你嘅人生 除咗你自己」、「從你字裏行間，你老公都應該係媽寶，咁你就更加要小心」、「如果你老公唔幫你，你同佢生小朋友只會係地獄嘅開始。」
