一家人應該要互相幫助，但亦不能過於遷就。有港女日前在網絡討論區大吐苦水，指近日家姐因為家中裝修帶同丈夫回娘家暫住，她被迫做廳長2個月，怎料家姐得寸進尺，竟想迫自己搬走，再把其睡房改為BB房，以方便媽媽幫手湊孫，令她忍不住委屈發文。
該女網民於3日（周一）在香港討論區以「家姐問我可唔可以搬走，咁我間房就可以拎嚟做BB房」為題發帖，指自己從小和家姐同房，家姐出嫁後便搬走與老公同住，自己終於可以獨佔一間房，現時與跟爸媽同住。近期家姐屋企裝修，所以便與姐夫一同搬回娘家暫住，她諒在家姐懷孕的份上，好心讓出房間，做了兩個月的「廳長」。
豈料家姐竟然得寸進尺，表示日後BB出生後想讓媽媽「幫手湊B」，要求事主搬走以便騰出睡房做BB房。事主不想搬走，認為即使日後媽媽幫手照顧BB，亦不需要她騰出整間房做BB房，而且不解為何不讓媽媽到時去家姐住所湊B。她拒絕家姐的要求，卻被姐姐喝斥指罵，「家姐鬧我，係咪想叫佢個B瞓廳？出世之後都坐月，家姐都已經叫咗媽咪去佢度幫手，明明坐月嗰陣都可以叫媽咪去你哋屋企，但係之後又要個B嚟我哋度？」
對於家姐的斥責，事主大感委屈，認為一個BB無需用到一整間房，自己其實不介意張BB床放在自己房中，「點解要我搬出去自己住就係為咗讓返間房出嚟做BB房？BB又唔會喺我哋屋企長住，唔通有BB真係大晒咩，所有嘢都要人就佢？」被家姐「食住上」欺負，令事主頓失手足之情，事後家姐甚至「扮晒可憐咁話我呢個做細妹都唔讓下佢呢個大肚婆」，令她失望至極。
雖然家姐理直氣壯要求妹妹搬走，但事主表示屋主是爸爸，家姐婚後「一蚊都冇畀過」，現時搬回娘家「日日好似大帝咁」。雖然父母尚未知情，但她認為父母會偏袒家姐，尤其媽媽一直偏心家姐多些，覺得家姐嫁得不錯，經常叫事主「學吓家姐」，而爸爸則覺得一家人幫到就幫，「真係懷疑自己係咪執返嚟」。
相關帖文引起網民熱烈討論，不少人同情樓主遭遇並怒斥家姐自私，甚至有網民懷疑家姐想霸屋，「你家姐都多餘，擺明依家想逼你走之後佢地兩公婆就搬返黎住」、「嘩你家姐真係識玩，遂點遂點搬過來之後迫走你地一家，佢地霸住間屋」、「佢唔當你係細佬/妹,你都唔使當佢係家姐」、「你家姐擺明當你阿媽係免費保母，佢想你搬走再借啲意搬返去住，間屋再租俾人」。
